Haradinaj: Dola nga takimi sepse Kurti mbante ligjërata, s’tregoi pse ka prishur raportet me ShBA
Kryetari i Aleancës për Ardhmërinë e Kosovës, Ramush Haradinaj, është deklaruar pas takimit me kryeministrin e Kosovës, Albin Kurti, dhe liderët e opozitës.
Takimi i tij zgjati pak minuta, dhe për këtë Haradinaj me anë të një postimi në llogarinë e tij në Facebook, ka thënë se është detyruar ta lëshojë takimin për shkak se siç thotë ai Kurti mbante ligjerata dhe nuk tregonte arsyen e prishjes së raporteve me Shtetet e Bashkuara të Amerikës.
Kjo për Haradinajn është e papranueshme.
“Edhe pse isha pjesë e takimit me kryeministrin Kurti, u detyrova ta lëshoj takimin sepse Kurti mbante ligjërata e nuk na sqaronte se përse ka prishur raportet me Amerikën dhe përse nuk po kthehej që të realizojë kërkesën e tyre.
Për mua është e papranueshme që në raste kaq të ndjeshme, të prishim raportet me aleatin kryesor të sigurisë”, ka shkruar ai.
Takimi në mes të kryeministrit të Kosovës, Albin Kurti dhe liderëve opozitarë ka filluar në orën 8:00 të cilin është paraparë të diskutohet për situatën e fundit në veri të vendit.
Të gjithë partitë opozitare i janë përgjigjur ftesës për takim nga Kreu i Qeverisë së Kosovës, Kurti.
Ndryshe, të hënën, kryetari i Partisë Demokratike të Kosovës (PDK), Memli Krasniqi, i ka dërguar një letër kryeministrit të Kosovës, Albin Kurti, në lidhje me situatën aktuale në veri të vendit, për të cilën, PDK-ja ka ngritur shqetësimet e saj.
Sipas Krasniqit, dorëheqjet e fundit të Listës Serbe e të zyrtarëve policorë e punonjësve në sistemin e drejtësisë nga institucionet e Kosovës, përbëjnë akt të paprecedent dhe krijojnë një situatë problematike për Kosovën.
“Zhvillimet e fundit në pjesën veriore të vendit janë shumë shqetësuese dhe cenojnë funksionimin, stabilitetin dhe sovranitetin e shtetit tonë. Në këtë situatë, ku epilogu është i paqartë e rreziku i përshkallëzimit është evident, komunikimi dhe harmonizimi i veprimeve të institucioneve dhe të gjithë akterëve politikë është i domosdoshëm”, ka shkruar Krasniqi në Facebook.
Ai ka kërkuar nga Qeveria që të ketë harmonizim të veprimeve me opozitën dhe gjithë spektrin politik, dhe po ashtu, të ketë koordinim edhe me aleatët ndërkombëtarë.
Ndërsa, kryetari i AAK-së, Ramush Haradinaj, ka thënë se në skenarët e “satelitëve të Serbisë” që për qëllim kanë dështimin e marrëveshjes së planit franko-gjerman është kyqur dhe kryeministri i Kosovës, Albin Kurti.
Ndërkaq, Kurti, në lidhje me situatën në veri të vendit, në një konferencë për media ka thënë se nuk bëhet fjala për targa të automjeteve, as për suspendimin e Nenad Gjuriqit, por për refuzimin që Serbia i ka bërë nismës së Berlinit e Parisit.
“Serbia duhet ta kamuflojë këtë refuzim që i ka bërë Evropës dhe ShBA-së, cfarë po ndodh tani shpjegohet me përpjekjen e Beogradit, për ta ambalazhuar nismën franko-gjermane”, ka deklaruar Kurti në një konferencë të përbashkët me ministrin e Punëve të Brendshme, Xhelal Sveçla.
Sipas Kurtit, Serbia qartazi është e interesuar për të sabotuar dialogun dhe cfarëdo marrëveshje, pasi është në koordinim me grupet ilegale serbe.
