Grupi Qytetar i Pavarur për Vetëqeverisje të Gjilanit, nisma qytetare që pritet të formohet e konstituohet të shtunën
Një nismë qytetare, e cila ka nisur si ide muaj më parë, të shtunën pritet të konstituohet si një Grupim Qytetar i pavarur për Vetëqeverisjen Lokale.
Sipas njoftimit adresuar tek mediat, bëhet fjalë për një iniciativë të Prof. Dr. Flamur Hyseni me bashkëpuntorë, e cila nismë mëton të sjellë “një frymë ndryshe” politike, në shërbim të qytetarëve.
Përmes një nënshkrimi të deklaratës dhe një konference për media të paralajmëruar, ky grupim pritet të zyrtarizohet sot, e shtunë 30 shtator 2023, me fillim në ora 11:00h, në Gjilan.
Lajmin e ka bërë të ditur vet Dr. Flamur Hyseni, i cili nuk ka dhënë më shumë detaje, përveç njoftimit se me aktin e nënshkrimit zyrtar të deklaratës themeluese, do të organizohet një konferencë me media.
Padyshim se përveç interesimit publik për këtë nismë politike, e cila pritet të integrohet në mozaikun politik të komunës së Gjilanit, mbase në të ardhmen edhe si pjesë e garave zgjedhore, mbretëron interesim e kurreshtje edhe lidhur me strukturën përbërse të grupimit dhe emrat të cilët do të përfshihen në të.
TV Gjilani, ndonëse ka disa njoftime jozyrtare për emrat e përbërjes themeluese të GQPVGJ-së, më gjërësisht do t’iu njoftoj pas konferencës së paralajmëruar.
