Gjimshiti flet para përballjes me Anglinë: Duhet të japim gjithçka në fushë dhe nëse e arrijmë është një sukses i mirë
Trajneri i kombëtares shqiptare, Sylvinho dhe kapiteni i kombëtares Berat Gjimshiti kanë dal në konferencë për media para ndeshjes me Anglinë.
Sfida luhet nesër në një terren mjaft të vështirë si “Wembley”, por kapiteni i kombëtares thotë se Anglia nuk duhet të nënvlerësojë kombëtaren shqiptare, shkruan Arbresh.info.
“Anglia ndaj shumë shteteve është e favorizuar për të fituar. Nuk mund të flasim për këtë. Nuk besoj se Anglia do të na nënvlerësojë. Në futbollin e sotëm nuk dihet kurrë dhe nuk besoj se do të ketë nënvlerësim nga ana e tyre”.
“Mendoj se kemi bërë Europian të mirë, ndonëse nuk kaluam. Përqendrimi duhet 100% në të gjithë lojën. Nëse shikojmë ndeshjet, kemi marrë gola në pak minuta në ndaj Kroacisë dhe Italisë. Kundërshtarët e këtij niveli mund të të bëjnë dëm shumë shpejt”, tha Gjimshiti.
Më tej ai foli për atmosferën në kombëtare para kësaj sfide.
“Atmosfera është shumë e mirë. Ka një frymë të re. Ka lojtarë të rinj dhe talente, të cilët e përmirësojnë ekipin. Të gjithë japin maksimumin në fushë, për të arritur një objektiv që nuk është arritur kurrë”.
“Ëndrrat thonë që nuk janë të mundura, por disa ëndrra realizohen. Unë kam besuar gjithmonë. Nuk jam ai tipi që fshihet duke thënë se jemi kombëtare më e vogël se Anglia. Duhet të japim gjithçka në fushë dhe nëse e arrijmë është një sukses i mirë”.
“Forca e tyre dihet. Nuk mund të flasim fare për ta. Jemi përgatitur mirë. Trajneri na ka dhënë ato që duhet të japim në fushë. E rëndësishme është që ekipi të bëjë atë që duhet në fushë. Jemi përgatitur shumë mirë dhe të shohim nesër”, shtoi tutje.
Për fund Gjimshiti foli rreth gjasave të Shqipërisë për kalim në Botëror duke marrë parasysh grupin që kanë.
“Është herët që të flasësh për shanset, por me kalimin e ndeshjeve, mund ta shikosh më mirë. Nuk do futemi në fushë duke mos menduar për kualifikimin. E rëndësishme është që të japim gjithçka në fushë”, deklaroi Gjimshiti.
Ndeshja e parë mes Anglisë dhe Shqipërisë luhet nesër me fillim nga ora 20:45.
