Gjimnazi ” Zenel Hajdini” shënoi edhe një përvjetor – Fjala e drejtorit, Jeton Rexhepi
Gjimnazi ” Zenel Hajdini” shënoi edhe një përvjetor – Fjala e drejtorit, Jeton Rexhepi
Gjimnazi ” Zenel Hajdini” sot shënon edhe një përvjetor; feston një vit tjetër rrite e suksesi në të gjitha drejtimet!
Kemi bërë ndryshime të mëdha këtë vit; ndryshime që po i shihni; ndryshime që po e rihumanizojnë ambientin mësimor me investime të shumta, falë mbështetjes së vazhdueshme të DKA – s dhe Kryetarit të Gjilanit z. Alban Hyseni. Ambientet e rifunksionalizuara do të krijojnë mjedis më të mirë për punë e mësim dhe do të jenë me rëndësi që nxënësit e mësimdhënësit të kenë preokupim vetëm suksesin dhe dijen.
Siç e dimë të gjithë mësimi kabinetik tashmë po jep rezultate. Krahas angazhimeve të tjera ka ngritur disiplinën e nxënësve e mësimdhënësve, përkushtimin dhe suksesin.
Falë punës, përkushtimit, përgjegjshmërisë, angazhimit e besimit reciprok të mësimdhënësve, drejtuesve e nxënësve e krahas përkushtimit të punëtorëve teknik e bashkëpunimit me prindër, Gjimnazi jonë tashmë ka fytyrë tjetër, dhe po shkon drejt asaj që e duam, që mundemi e që duhet ta bējmë.
Kemi pasur këtë vit, pos angazhimit e suksesit në mësimnxënie, edhe angazhime e suksese të shumta në gara sportive, aktivitete mjedisore; trajtim temash të ndryshme e të ndjeshme problemore të shoqërisë e kategorive të ndryshme të nxënësve. Të gjitha këto falë vullnetit e angazhimit të mësimdhënësve e nxënësve. Më lejoni që di drejtues t’ju falënderoj për këtë; të shpreh mirënjohjen time dhe gjithë besimin në dijen, mundësitë e vullnetin tuaj.
Po provojmë që të funksionojmë si një mekanizëm i vetëm ku secili është pjesë e rëndësishme, sepse vetëm kështu do të ndjehemi të plotësuar e të dobishëm për shkollën, shoqërinë e atdheun tonë.
Falënderim nxënësve dhe respekt të thellë për përpjekjet e bashkëpunimin, për mirëkuptimin dhe pasionin në detyrat që kemi shtruar bashkë.
Falënderim maturantëve që do t’u thonë lamtumirë këtyre ambienteve. Paçi shëndetin e sukseset tuaja u dëgjofshin kudo. Krenar e të lumtur që ishim bashkë për tri vite.
Falënderim e respekt stafit ndihmës që ishin pjesë e punës së përbashkët jo vetëm në mirëmbajtje.
Falënderim prindërve dhe gjithë atyre që na ndihmuan që këtë vit ta kemi më të mirë.
Jam i bindur që kështu bashkë, me qëllime të qarta; me respektim të ligjeve e rregullave, me dashuri për shkollën e dijen…. vitin tjetër do të jemi edhe më mirë, edhe më të suksesshëm. Unë besoj në këtë; unë besoj në të gjithë ju. Unë besoj sepse kjo është puna jonë, misioni ynë, dhe këtë punë e mision e mban vetëm pasioni dhe dashuria për dijen, suksesin, rritën e të rinjve tanë – vendit tonë.
Alternativë nuk ka, sepse be jemi lokomotiva e vendit tonë, e Kosovës tonë.
Urime e gëzuar edhe këtë përvjetor të Gjimnazit tonë.
Paçi shëndet e gëzuar!
Ju falemnderit!
Drejtori: Jeton Rexhepi.
