Gjilan: Zyrtar i KEDS-it dyshohet se ka marrur ryshfet, qytetari akuzohet për sulm
Sic është raportuar në media, gjatë ditës ka ndodhur një rast i ndjeshëm në Gjilan, ku një zyrtar i KEDS-it dhe një qytetar janë përfshirë në një konflikt që ka rezultuar me dy raste të veçanta penale.
Burimet mediale bëjnë me dije se më 17 shtator 2025, rreth orës 11:55, në rrugën “Avdulla Presheva”, një qytetar ka akuzuar zyrtarin e KEDS-it, për marrje ryshfeti.
Sipas deklaratës, i njejti i kishte dhënë zyrtarit 50 euro – prej të cilave 30 për shlyerjen e një borxhi të rrymës dhe 20 euro për një shërbim tjetër privat të cilin zyrtari supozohet se ia kishte kryer.
Por pasi qytetari më pas ka verifikuar se vetëm 30 euro ishin paguar për borxhin, ai është revoltuar dhe ka kërkuar llogari nga zyrtari, duke e akuzuar për përvetësim të shumës prej 20 eurosh.
Nga ana tjetër, zyrtari ka pranuar se ka kryer një shërbim privat jashtë detyrës së tij zyrtare dhe për këtë ka marrë 20 euro, ndërsa pjesën tjetër e ka përdorur për pagesën e faturës së rrymës.
Sipas njoftimit, që të dy janë shoqëruar në stacionin policor për intervistim dhe pas konsultimit me prokurorinë janë iniciuar dy raste të ndara: një për sulm dhe një tjetër rast për marrje ryshfeti.
Hetimet lidhur me këtë ngjarje janë duke vazhduar.
