Gjilan: Elhami Shabani, sportisti i vitit 2022
Viti 2022 ka qenë ndër më të mirat vite, me rezultate kulmore për ish karateistin e KK Drita, Elhami Shabani, i cili tash e dy vjet e ka formuar klubin e tij “Karate Club Emperors”, të cilin e menaxhon me plotë sukses, pjesë e të cilit tashmë është edhe vet.
Rezultatet e arritura në rrafshin kombëtar e ndërkombëtar e kanë kurorëzuar punën permanente të tij, me rastin e shpalljes – Sportist i Vitit 2022 nga Komuna e Gjilanit.
Ai me të drejtë është vlerësuar, cilësuar, shpallur e kurorëzuar nga sportdashësit, por edhe nga institucionet, si sportisti më i mirë i vitit 2022 nga Komuna e Gjilanit.
Komuna e Gjilanit, gjegjësisht Drejtoria për Kulturë, Rini e Sport ia ka akorduar këtë çmim me motivacion për sukseset e arritura në garat vendore dhe ato ndërkombëtare.
Karatisti i KK Drita, Elhami Shabani, është fitues i medaljes së bronztë në Kampionatin Evropian të Karatesë, nënkampion Ballkanik; Kampion i Kosovës në Karate dhe fitues i shumë turneve në vend, rajon e botë, njëherit edhe kampion mbarëkombëtar.
