Futbolli i do historitë e tij, por ajo që ndodhi mbrëmjen e së shtunës me Rey Manaj është diçka që të lë pa fjalë!
Vetëm disa muaj më parë, më 7 qershor 2025 në “Air Albania”, Shqipëria dhe Serbia u ndanë në barazim 0-0.
Në atë ndeshje, Manaj kishte mundësinë t’i jepte fitoren historike kuqezinjve nga pika e bardhë, por ai e humbi penalltinë në minutën 45+2. Zemërimi, zhgënjimi dhe valët e kritikave që pasuan ishin të mëdha, madje shumë tifozë nuk e kursyen as ofendimet ndaj tij.
Por këtë të shtunë, historia u përsërit… në mënyrën më të pabesueshme të mundshme.
Në Leskovac, përballë të njëjtit rival, Rey Manaj shënoi pikërisht në minutën 45+2, duke vulosur fitoren më të madhe të Shqipërisë ndaj Serbisë në histori. Nga pika e dhimbjes në Tiranë, në majën e lavdisë në Serbi, një cikël që vetëm futbolli mund ta shkruajë me kaq emocion.
Ndeshja u zhvillua në një atmosferë të zjarrtë, ku nuk munguan as thirrjet e rënda të një pjesë të tifozëve serbë si “vritini shqiptarët” dhe “Kosova është Serbi”, ndërsa në tribuna u shfaq edhe një banderolë provokuese me hartën e Kosovës të mbuluar nga flamuri serb, ngjarje që pritet të sjellin ndëshkim nga UEFA.
Kuqezinjtë megjithatë ruajtën qetësinë dhe karakterin, duke mbrojtur rezultatin deri në fund. Në sekondat e fundit, Nedim Bajrami humbi mundësinë për të dyfishuar, por fitorja ishte e siguruar.
Me këtë triumf historik, Shqipëria konsolidon vendin e dytë në Grupin K me 11 pikë, duke lënë pas Serbinë me 7 pikë, ndërsa Anglia kryeson me 15 pikë.
Pas ndeshjes, trajneri i Serbisë Dragan Stojković dha dorëheqjen, duke pranuar përgjegjësinë për humbjen:
“Unë jam fajtor. Nuk e prisja këtë rezultat. Sporti ka edhe ditë të tilla.”
Një natë që do të mbetet gjatë në kujtesën e çdo shqiptari, një histori e hakmarrjes së ëmbël, e shkruar me zemër, disiplinë dhe krenari kuqezi.
