Festivali Teatri Shqiptar i Maqedonisë së Veriut, edicioni 22
Nata e gjashtë – Teatri i Gostivarit – Shfaqja ” Mos i luaj anglezët”, Regjisor: Elmir Sejfullai
Luaj si të duash(1 x apo 2) edhe kur fiton je humbës!
Nje temë sociale me situate komike që tragjizmin e ka në sfond si kërcënim nga pasioni i tepërt për lojërat e fatit.
Shkruan: Agron Gërguri – dramaturg
Aktorët Driton Lazmi, Vullnet Ismani, Besnik Rushiti me një lojë kolektive harmonike të cilës i printe Driton Lazmi me veprime foljore dhe fizike trajtuar me plastikë e miniatura të bukura i bënë me qesh spektatorët dibranë që ishte edhe qëllimi final i kësaj shfaqjeje.
Një nga karakteristikat e dukshme ishte aplikimi i të folmes gostivarçe që regjisori e kishte nxjerrë si karakteristikë të shfaqjes e cila shkaktonte ilaritet edhe tek ata që nuk i kuptonin disa nga shprehjet e veçanta por shprehjen “nouk”e kuptonin gjithësesi!
Bixhozi është një mënyrë për të rritur adrenalinën që pastaj stimulon stresin por si ves i keq thuaja gjithësesi të involvuarit i dërgon deri në zgripc apo domosdo në degradim material dhe humbje që shkojnë përtej materiales.
Të gjitha këto gjendje provohen “lehtësisht” në komedinë “Mos i luaj anglezët”
Ata që të tretë janë në krizë, ngushëllim e kanë njëri tjetrin por kjo nuk i pengon të nxjerrin të palarat tjera në marrëdhëniet midis tyre që kanë të bëjnë me flertimin, kodëshllëkun, profesionin, dashurinë, vdekjen e ambicien.
Duke qenë se bixhozi është një pasion i keq e gjithë marrëdhënia mund ta shkatërrohet varësisht tipit 1 x apo 2 në përpjekje për të kapur rezultatin skuadrave angleze si një shansë përfundimtare.
E mira e shfaqjes ishte vetë trajtimi i relaksuar i një dukurie të keqe e cila do shqyrtim për faktin se edhe këtu në Dibër ku po mbahet festivali gjithandej ke ofertë për të provuar fatin i cili jo rrallë ka një fund tragjik.
Në shfaqje ishte relativizuar në masë të madhe efekti i këtij pasioni edhe pse të tre personazhet duket sikur rrinë në teh të fatit. Në fund nuk ndodhë asgjë përveçse asnjeri prej tyre nuk fiton. Fundja në bixhoz edhe kur fiton je humbës!
–
Regjisura e “padukshme” e Sejfullait u kishte dhënë hapësirë shprehjes së aktorëve. Mizanskeni ishte në harmoni me situatat skenike dhe karakteret e personazheve.
–
Skenografia tejet funksionale poashtu edhe përbërsit tjerë të shfaqjes ishin në funksion të rrëfimit.
*****
Sonte NATA FINALE
Shfaqja ” Shitet një i vdekur”
Teatri i skenës së pavarur, Tiranë
Ora: 20:00
Shtepia për kulturë, Dibër
*
Pas shfaqjes ceremonia e ndarjes së çmimeve.
*
Ejani në Teatër artistët meritojnë duartrokitjet tuaja!
