Fatbardh Veseli dhuron librin e tezës së doktoraturës për bibliotekën e UKZ-së
Në një takim me rektorin e Universitetit Publik “Kadri Zeka”, prof. asoc. dr. Artan Dermaku, z. Fatbardh Veseli ka dorëzuar për bibliotekën e universitetit pesë ekzemplarë të librit të tezës së tij të doktoraturës, të mbrojtur në Goethe Universität Frankfurt am Main.
Teza, e titulluar “Një kornizë për vlerësimin e sistemeve të kredencialeve të bazuara në atribute të përmirësuara nga privatësia”, përfshin kërkime të thelluara në fushën e informatikës dhe matematikës. Ky kontribut i Veselit do të shërbejë si një burim i rëndësishëm për studentët dhe stafin akademik të UKZ-së, duke u mundësuar atyre të njihen me zhvillimet më të fundit në teknologjitë e kredencialeve dhe privatësisë.
Rektori Dermaku e falënderoi z. Veseli për këtë dhuratë, duke theksuar rëndësinë e promovimit të dijes dhe lidhjes së studentëve me kërkimin shkencor ndërkombëtar.
Disertacioni i doktoraturës, i mbrojtur më 13 janar 2020 në Fakultetin e Matematikës dhe Shkencave Kompjuterike të Universitetit Goethe në Frankfurt, shqyrton teknologji të avancuara kriptografike që sigurojnë privatësinë e përdoruesve në botën digjitale. Këto teknologji mundësojnë autentikimin e sigurt të përdoruesve pa nevojën për të zbuluar identitetin e tyre, duke rritur besueshmërinë e teknologjisë dhe duke mbrojtur veprimet e individëve nga monitorimi masiv në internet.
Ky akt simbolizon jo vetëm kontributin personal të autorit, por edhe përpjekjet e UKZ-së për të pasuruar burimet akademike dhe për të nxitur kërkimin shkencor të avancuar në universitet.
