Është pensionuar Shefik Azizi, profesor i gjeografisë në Gjimnazin Natyror “Xhavit Ahmeti”
Pas një pune mbi 36-vjeçare në arsim, këtë të martë është pensionuar Shefik Azizi, profesor i gjeografisë në Gjimnazin Natyror “Xhavit Ahmeti” në Gjilan.
Me këtë rast, në këtë kolektiv është organizuar një takim përshëndetës, në të cilin janë thënë fjalë miradije për profesorin Shefik, për të cilin drejtori Bekim Mustafa tha se të gjithë së bashku kemi punuar me profesorin Shefik, që nuk ka qenë vetëm njeri profesional, por edhe njerëzor – një rrugëtim i gjatë dhe i pasur, që ai e ka përshkuar me përkushtim, pasion dhe mençuri.
Profesori Shefik Azizi, nuk i ka mësuar nxënësit e tij vetëm për lumenjtë, malet apo kontinentet e botës. Ai i mësoi ata që të kuptojnë hapësirën që i rrethon, të ndjejnë respekt për natyrën dhe kjo është një trashëgimi që nuk matet me vite pune, por me ndikimin që ka lënë në zemrat dhe mendjet e brezave.
“Pensionimi është një ndalesë e merituar, por ne e dimë se pasioni për dijen nuk fiket kurrë. Ju urojmë ditë të bukura, shëndet, qetësi dhe shumë kohë për të shijuar gjërat që ndoshta nuk keni pasur mundësi t’i bëni ndër vite”, ka thënë drejtori Bekim Mustafa, derisa zëvendësdrejtori i shkollës, Agim Asllani e ka falënderuar profesorin Shefik për çdo orë mësimi, çdo këshillë dhe çdo buzëqeshje që ka dhënë ndër vite.
Në këtë ditë të veçantë, Shefik Azizi, profesor, nuk ka lënë pa falënderuar kolektivin e Gjimnazit Natyror “Xhavit Ahmeti”, sikurse edhe familjen e tij që e ka mbështetur në kohët më të vështira.
Ai kishte nisur profesionin e mësimdhëniet para 36 viteve dhe kishte ndërruar disa shkollë, andaj falënderoi të gjithë ata ku kishte punuar.
“Në gjimnaz gjeta mjedis pune, mjedis respekti dhe harmonie ndërkolegiale. Gjeta shumë shokë e shoqe. Asnjëherë nuk u ndjeva i anashkaluar, por përkundrazi, u ndjeva i afërt”, ka thënë profesori Shefik Azizi, që ka shtuar se Gjimnazi Natyror “Xhavit Ahmeti” njihet si shkollë elitare në rajon, andaj mësimdhënsve të rinj që do të vijnë u ka uruar që të jenë më të mirë se gjeneratat e tjera.
Shefik Azizi është i lindur më 21 tetor 1960 në Vranjë. Bashkë me prindërit kanë jetuar në fshatin Ramabuqë (treva e Hashanisë) deri në 1980. Babai i tij merrej me zejen e përpunimin të drurit, ndërsa nëna ishte amvise. Në familje ishin 4 fëmijë, 2 vëllezër dhe 2 motra, Shefiku ishte fëmija i dytë.
Shkollimin fillor e ka kryer në SHF ”Migjeni” në Muhovc, ndërsa shkollimin e mesëm e ka kryer pjesërisht (dy vjet) në gjimnazin “Sezai Surroi” në Bujanovc dhe dy vjet të tjera në gjimnazin “Zenel Hajdini” në Gjilan.
Gjatë viteve të 80 ta është regjistruar në FSHMN, dega gjeografi dhe e ka përfunduar fakultetin në mars të vitit 1988.
Në shator të vitit 1988 është punësuar si profesor i gjeografisë në Shkollën Profesionale Teknike “Dragi Popoviq” Gjilan, e cila më pas do të emërohej “Mehmet Isai”, pasi që nxënësit e mësimdhënësit shqiptarë u përjashtuan nga shkolla dhe mësimi vazhdoi në ”Shtëpi shkolla”. Në këtë shkollë vazhdoi deri në vitin 2003, kur shkaku i reformave në sistemin e arsimit në Kosovë, në shkollat teknike nuk mësohej lënda e gjeografisë. Në vitin shkollor 2003/04 angazhohet në kontingjentin e arsimtarëve që do të punojnë me klasën e IX-të, të sapo aplikuar në Kosovë. Në nëntor të vitit 2003, nga DKA është angazhuar si koordinator për organizimin dhe përcjelljen e mësimit në klasën e IX-të, Gjimnazi “Zenel Hajdini”, ”Arbëria”, ”Thimi Mitko” dhe” Rexhep Elmazi”.
Gjatë vitit shkollore 2004/05 deri më 2008 është angazhuar si arsimtar i gjeografisë në SHMU “Thimi Mitko”. Nga nëntori i vitit 2008 deri më 2015 ka punuar si profesor i gjeografisë në SHMB “Arbëria”, kurse më pas angazhohet si profesor i gjeografisë në gjimnazin “Zenel Hajdini”.
Nga janari i vitit 2015 e deri më tani ka qenë i anë i angazhuar si profesor i gjeografisë në gjimnazin “ Xhavit Ahmeti”.
Profesori Shefik Azizi punoi 36 vite në arsim, duke u angazhuar gjatë tërë kohës që të arrijë rezultate të mira në punën edukativo-arsimore.
Në të gjitha shkollat ku ka punuar ka qenë i respektuar, i vlerësuar dhe i pranuar tek nxënësit, kolegët dhe i tërë komuniteti tjetër më të cilët ka bashkëpunuar.
Në Gjimnazin Natyror “Xhavit Ahmeti”, në ceremoninë e pensionimit, atij iu ndanë mirënjohje e dhurata nga kolektivi. /kryelajmi.com/.
