Ekipi i Policisë inkuadrohet në Superligë – Kreu i FFK-së e uron
Kryetari i Federatës së Futbollit të Kosovës, Agim Ademi, ka uruar FC Policia e Kosovës për shpalljen kampione në Ligën e Parë të futsallit dhe sigurimin e inkuadrimit në Superligën e Kosovës.
Ademi vlerësoi paraqitjet e skuadrës gjatë këtij edicioni, duke theksuar se ekipi dëshmoi organizim, disiplinë dhe cilësi sportive, ndonëse vetëm një vit më parë iu bashkua garave nën ombrellën e FFK-së.
“Me paraqitje të shkëlqyera gjatë gjithë kampionatit, skuadra e Policisë së Kosovës arriti me plot meritë të shpallet kampione e Ligës së Parë dhe të sigurojë promovimin në elitën e futsallit kosovar për edicionin e ardhshëm”, ka shkruar Ademi.
Ai shtoi se ky sukses pasqyron vlerat që përfaqëson institucioni i Policisë së Kosovës, si përkushtimin, profesionalizmin dhe punën ekipore.
Kreu i FFK-së përgëzoi drejtorin e përgjithshëm të Policisë së Kosovës, Gazmend Hoxha, lojtarët, stafin teknik dhe të gjithë pjesëtarët e klubit për këtë arritje.
Njëkohësisht, Ademi uroi edhe FC Rahovecin për rikthimin në Superligën e Kosovës në futsall.
