“A p’e ndjen se toka po ngurron?” – Arbnor Karaliti hap ekspozitën personale në Gjilan
Më 14 maj hapet ekspozita personale e Arbnor Karalitit në Gjilan.
Galeria e Arteve në Gjilan do të hapë më 14 maj 2026, nga ora 19:00, ekspozitën personale “A p’e ndjen se toka po ngurron?” të artistit Arbnor Karaliti.
Ekspozita sjell tri cikle punësh – “As këtu, as atje”, “Duke ecur nëpër fusha drejt shtëpisë” dhe “Kronikat e divanit” – të cilat trajtojnë temat e pritjes, përkohshmërisë, kujtesës dhe raportit të individit me hapësirat urbane e sistemet shoqërore.
Përmes pikturës dhe instalacionit, Karaliti ndërton një reflektim mbi migrimin, traumën dhe format e heshtura të intimitetit, duke e vendosur jetën në një gjendje pezull mes së kaluarës dhe së tashmes, përkatësisë dhe izolimit.
Sipas përshkrimit të ekspozitës, titulli “A p’e ndjen se toka po ngurron?” sugjeron një ndjenjë pasigurie dhe paqëndrueshmërie, duke krijuar një komunikim të drejtpërdrejtë me shikuesin.
Ekspozita mbështetet nga Drejtoria për Kulturë, Rini dhe Sport e Komunës së Gjilanit.
