Edicioni i 33-të i Kalimerës Poetike “Basri Qapriqi” nis sonte në Ulqin
Shoqata e Artistëve dhe Intelektualëve “Art Club”, nga 11-13 shtator 2025, do të organizojë edicionin e 33-të të manifestimit Kalimera Poetike “Basri Çapriqi” në Ulqin.
Në programin e edicionit të sivjetshëm është mbrëmja letrare homazh kushtuar shkrimtarit Ibrahim Berjashi, kryetarit të parë të “Art Club”-it dhe njërit prej themeluesve të “Kalimerës Poetike”, i ndarë nga jeta në muajin mars të këtij viti, si dhe dy mbrëmje autoriale që do t’u kushtohen shkrimtarëve Besnik Mustafaj dhe Ilire Zajmi.
Në kuadër të këtij edicioni do të hapet edhe ekspozita/instalacioni “Ofshamë” (Shpella e lakuriqeve) i Zake Prelvukajt, ngjarje kjo që dë të mbahet në sheshin para Muzeut në Kalanë e Ulqinit.
Ndërkohë, ky edicion do të përmbyllet me një mbrëmje autoriale për Ilire Zajmin, më 13 shtator, në ora 20:00 në Muzeun Etnografik- Draginë. Vepra e Ilire Zajmit do të diksutohet nga studiuesja e letërsisë, njëherit edhe shkrimtare Dije Demiri-Frangu.
Mbyllja e manifestimit do të bëhet nëpërmjet një pike muzikore, ku do të prezantohen: Anton Kafalli në violin dhe Ares Fani në kitarë.
“Kalimera Poetike” do të mbahet në tri vende të ndryshme në komunën e Ulqinit – Muzeun e Ulqinit në Kala, Librarinë “Ulqini” dhe Muzeun Etnografik në Draginë, duke synuar që përpos letërsisë të promovojē edhe trashëgiminë historike e kulturore dhe potencialet turistike të këtij qyteti.
