Drita kërkon fitore dhe kualifikim historik ndaj FCSB
Drita do të përballet sonte me FCSB në ndeshjen e kthimit të raundit të tretë të Ligës së Evropës.
Pas paraqitjes së mirë në Bukuresht një javë më parë, gjilanasit synojnë të arrijnë një fitore vendimtare para tifozëve të tyre.
Në ndeshjen e parë, Drita kishte epërsi 0-2, por në fund u mposht 3-2, duke lënë gjithçka të hapur për kualifikim.
Kampioni në fuqi i Kosovës është i motivuar për një fitore historike, ndërsa mysafirët nga Rumania synojnë të ruajnë avantazhin.
Lajm i mirë për Dritën është rikthimi i sulmuesit Liridon Balaj, i cili kthehet pas suspendimit.
Mungesa e vetme në skuadrën e gjilanasve do të jetë ajo e mbrojtësit kolumbian Juan Camilo Mesa.
Dueli zhvillohet sonte nga ora 20:00 në stadiumin “Fadil Vokrri”, ku pritet atmosferë e zjarrtë nga tifozët vendas.
