Disa këngëtarë të grupit vdiqën. Zjarri fatal në diskotekë, shumë trupa nuk janë identifikuar

Tragjedia në Koçan: 59 të vdekur, mes tyre muzikantë, një polic dhe dhjetëra të rinj – Familjarët bllokojnë spitalin.

Shkup – Po rëndohet bilanci i tragjedisë së paprecedentë që ka tronditur Maqedoninë e Veriut, pasi një zjarr shkatërrues në diskotekën “Puls” në Koçan ka shkaktuar vdekjen e 59 personave. Ndërsa ulet numri i të plagosurve, por rritet i të vdekurve, shqetësim ngjall fakti se deri tani, vetëm 35 viktima janë identifikuar, ndërsa shumë trupa mbeten ende të paidentifikuar.

Viktimat janë kryesisht të rinj nga 14 deri në 25 vjeç, duke e bërë këtë një nga tragjeditë më të mëdha në historinë e vendit.

Sipas Ministrit të Brendshëm Pançe Toshkovski, 155 persona janë plagosur, me mbi 30 në gjendje kritike. Viktimat dhe të plagosurit janë nga Shkupi, Shtipi, Probishtipi dhe Koçani, ndërsa shumë pacientë po trajtohen në spitalet kryesore të vendit.

Tragjedia zhyt dhe botën e muzikës: Humbën jetën muzikantë të njohur

Mes viktimave janë edhe anëtarë të grupeve muzikore të njohura në Maqedoninë e Veriut:

Andrej Gjorgjieski, kitarist i grupit DNK

Aleksandar Efremov, fotograf i grupit DNA

Aleksandar Kolarov, muzikant nga Shtipi

Filip Stevanovski, një tjetër muzikant nga Shtipi

Dramatike është historia e dy motrave që humbën bashkëshortët e tyre në këtë tragjedi. Irena Krstevska Stevanovska, bashkëshortja e Filipit, dhe Maja Krstevska, gruaja e Aleksandrit, kanë humbur të dashurit e tyre në këtë zjarr tragjik.

Një polic humbi jetën gjatë operacionit

Mes viktimave është edhe një efektiv i Policisë së Probishtipit, i cili ishte në detyrë, duke monitoruar trafikun e drogës dhe praninë e të miturve në diskotekë. Ai ndërroi jetë teksa përpiqej të ndihmonte njerëzit të shpëtonin nga flakët.

Familjarët bllokojnë spitalin, refuzojnë transportimin e trupave për obduksion

Situata në Spitalin e Përgjithshëm në Koçan është tensionuar, pasi familjarët e viktimave kanë bllokuar hyrjen e spitalit, duke kundërshtuar transportimin e trupave për obduksion në Shkup.

Rreth 30 automjete funerale dhe të ushtrisë janë dërguar për të transportuar trupat e viktimave, por protestat e familjarëve kanë vonuar procesin.

Të plagosurit dërgohen jashtë vendit për trajtim

Ministri i Shëndetësisë Arbër Taravari ka njoftuar se 20 pacientë në gjendje të rëndë do të dërgohen për trajtim në Bullgari, Turqi, Greqi dhe Beograd, ndërsa ndihmë është ofruar edhe nga Shqipëria dhe Holanda.

Hetimet vazhdojnë, priten arrestime të tjera

Autoritetet vazhdojnë hetimet për të identifikuar shkakun e zjarrit dhe përgjegjësit e kësaj tragjedie. Deri më tani, janë arrestuar ish-zyrtarë shtetërorë dhe persona të lidhur me menaxhimin e diskotekës, ndërsa dyshohet për shkelje të rënda të sigurisë.

Një komb në zi

Tragjedia e Koçanit ka prekur mbarë Maqedoninë e Veriut dhe më gjerë. Qyteti është mbuluar nga dhimbja, ndërsa vendi po përgatitet për një ceremoni masive varrimi për viktimat. Flamujt janë ulur në gjysmështizë dhe pritet shpallja e ditëve të zisë kombëtare. /noa.al

Shënim: Disa imazhe gjenden nga interneti, që konsiderohen të jenë në domenin publik. Nëse dikush pretendon pronësinë, ne do të citojmë autorin, ose, sipas kërkesës, do të heqim menjëherë imazhin.