Din Azizi fton publikun në hapjen e galerisë së parë të artit bashkëkohor në Livoç të Ulët

Ekspozita “Hektar i Kohës” shënon hapjen e një hapësire të re kulturore dhe prezanton 26 vite krijimtari artistike

Kush ka thënë se arti bashkëkohor jeton vetëm në Paris, Berlin apo Nju Jork?

Sipas artistit Din Azizi, një histori e re artistike po fillon të shkruhet shumë më afër – në Livoçin e Ulët të Gjilanit, ku për herë të parë po hapet një galeri e dedikuar ekskluzivisht artit bashkëkohor.

Hapja e kësaj hapësire të re kulturore do të shënohet me ekspozitën personale të vet artistit Din Azizi, “Hektar i Kohës”, një projekt që përmbledh 26 vite krijimtari, eksperimente artistike, performanca, instalacione, piktura dhe një rrugëtim të gjatë e të veçantë në art.

“Hektar i Kohës” vjen si një retrospektivë e pasur që sjell para publikut jo vetëm veprat, por edhe procesin krijues dhe evolucionin artistik të autorit ndër vite.

“26 vjet krijimtari. 1 hektar art. 1 natë që nuk duhet humbur”, është mesazhi me të cilin Din Azizi fton artdashësit, krijuesit, studentët dhe publikun e gjerë të bëhen pjesë e kësaj ngjarjeje të veçantë kulturore.

Organizatorët bëjnë të ditur se së shpejti do të publikohen programi i plotë dhe detajet e ngjarjes, e cila synon të sjellë një energji të re në skenën artistike të Gjilanit dhe më gjerë.