Detaje ekskluzive nga vjedhja e rëndë në “Oxa Gold”: Hajnat shpojnë murin nga mbrapa, hapin kasafortën me “bonsek” dhe zhdukin 650 mijë euro ari!
Një vjedhje e rëndë, me skenar të dyshuar të organizuar, ka ndodhur në lokalin e argjendarisë “Oxa Gold” në rrugën “Agim Ramadani” në Prishtinë, ku persona të panjohur kanë depërtuar brenda objektit duke shpuar murin nga pjesa e pasme, kanë hapur kasafortën dhe kanë marrë një sasi të madhe ari, me vlerë të raportuar rreth 650 mijë euro.
Nga burime mediale mësohet se rasti është raportuar më 19.01.2026, rreth orës 10:00, pasi Policia ka pranuar informacion për thyerje në lokalin “Oxa Gold”.
Burime të besueshme nga strukturat e afërta me hetimin bëjnë të ditur se në vendin e ngjarjes kanë dalë njësitë e hetuesisë dhe forenzikës, të cilët kanë kontaktuar pronarin, i cili ka deklaruar se lokali ishte mbyllur më herët, ndërsa sot rreth orës 10:00, djali i tij kishte shkuar për ta hapur lokalin dhe sapo kishte hyrë brenda, kishte vërejtur se objekti ishte i demoluar dhe se kishte shenja të qarta depërtimi.
Sipas të njëjtave burime, të dyshuarit dyshohet se kanë vepruar në mënyrë të organizuar, duke depërtuar brenda dhe duke vjedhur arin nga kati i parë, por jo vetëm – dyshohet se janë bastisur edhe kati i dytë dhe kati i tretë, ku është raportuar se është marrë ari nga disa hapësira.
Detajet nga vendi i ngjarjes tregojnë se hajnat dyshohet se kanë shfrytëzuar hyrje-daljen nga pjesa e pasme e objektit, duke dëmtuar murin dhe duke hyrë në lokalin përdhesë. Po ashtu, dyshohet se kasaforta është hapur me forcë, ku sipas hetimeve paraprake është përdorur mjet prerës i llojit “bonsek”, ndërsa në vend janë vërejtur edhe mjete të tjera që dyshohet se janë përdorur për thyerjen.
Një detaj tjetër që po hetohet, është edhe dyshimi se gjatë vjedhjes mund të jetë marrë edhe një armë me leje, që sipas raportimeve dyshohet të ketë qenë në pronësi të djalit të pronarit, i cili gjendet jashtë vendit.
Në lidhje me rastin janë intervistuar viktimat dhe dëshmitarët, ndërsa sipas pronarit, vlera e arit të vjedhur arrin shifrën e lartë prej rreth 650 mijë euro, ndërkohë që burime të tjera flasin se dëmi mund të shkojë edhe më lartë.
Për shkak të peshës së rastit, janë njoftuar Hetimet Rajonale, ndërsa në vendin e ngjarjes ka dalë edhe njësia e grabitjeve, e cila ka kontaktuar me Prokurorin Kujdestar, i cili ka udhëzuar që rasti të iniciohet si “Vjedhje e rëndë”.
Hetimet janë në zhvillim dhe autoritetet po punojnë për identifikimin e personave të përfshirë dhe zbardhjen e plotë të rastit.
Sinjali do t’ju sjellë detaje të reja në kohë reale.
