Botohet libri “Thyesat sipas Teorisë PIRIE-KIEREN”, një qasje e re për të kuptuar konceptin e thyesave
Gjilan – Është botuar libri “Thyesat sipas Teorisë PIRIE-KIEREN”, një studim që trajton një nga çështjet më sfiduese në mësimdhënien dhe nxënien e matematikës: të kuptuarit konceptual të thyesave. Autori e cilëson këtë botim si librin e tij të dytë, duke theksuar emocionin dhe rëndësinë personale e profesionale që mbart kjo arritje.
Libri sjell në vëmendje Teorinë Pirie-Kieren, një model i njohur ndërkombëtarisht në fushën e edukimit matematikor, i zhvilluar nga studiueset kanadeze Susan Pirie dhe Tom Kieren. Kjo teori fokusohet në mënyrën se si zhvillohet të kuptuarit matematikor përmes niveleve të ndërlidhura dhe rikthyese, duke e parë të nxënit si proces dinamik dhe jo linear.
Në kontekstin e arsimit parauniversitar, thyesat konsiderohen ndër temat më problematike për nxënësit, pasi kërkojnë kalim nga të menduarit konkret në atë abstrakt. Përmes kësaj qasjeje teorike, libri synon të ofrojë një kornizë më të strukturuar për mësimdhënësit dhe studentët e edukimit, duke ndihmuar në identifikimin e vështirësive dhe në ndërtimin e një kuptimi më të thellë të konceptit.
Botimi është realizuar me mbështetje financiare nga Universiteti “Kadri Zeka”, përkatësisht nga Fakulteti i Edukimit. Përgatitja për botim është bërë nën kujdesin e redaktorit prof. dr. Merxhan Avdyli, ndërsa recenzentë të veprës kanë qenë prof. dr. Abdullah Zejnullahu dhe prof. ass. dr. Shqipe Avdiu-Kryeziu.
Ky libër pritet të shërbejë si literaturë e dobishme për studentët e programeve të edukimit, mësimdhënësit e matematikës, si dhe studiuesit e fushës së didaktikës së matematikës, duke kontribuar në avancimin e praktikave bashkëkohore të mësimdhënies në Kosovë dhe më gjerë.
