Borell: Urdhri i Putinit për armëpushimin e Krishtlindjeve “jo i besueshëm”
Kryediplomati i BE-së e ka përshkruar një njoftim nga Vladimir Putin për një armëpushim 36-orësh për të shënuar Krishtlindjet Ortodokse si “jo të besueshëm”, duke shtuar se urdhri i presidentit rus dukej se ishte një përpjekje e Moskës për të “blerë kohë për të rigrupuar trupat e saj”.
Shefi i politikës së jashtme të BE-së Josep Borrell po fliste gjatë një vizite në Marok, raporton AFP.
Ai më tej vuri në dilemë besueshmërinë ndaj Kremlinit zyrtar përkitazi me armëpushimin e propozuar:
“Kremlinit i mungon plotësisht besueshmëria dhe kjo deklaratë e një armëpushimi të njëanshëm nuk është e besueshme. Ishte Rusia ajo që nisi këtë agresion të paligjshëm. Kur agresori flet për një armëpushim, mendoj se përgjigja që na vjen të gjithëve është skepticizëm përballë një hipokrizie të tillë.
Ai bëri thirrje për “veprime konkrete në terren”, duke përfshirë “ndalimin e plotë të sulmeve ushtarake” dhe tërheqjen e trupave dhe pajisjeve ushtarake nga territori ukrainas nga Moska.
“Në mungesë të veprimeve të tilla konkrete, një armëpushim i njëanshëm duket se është një përpjekje e Rusisë për të blerë kohë për të rigrupuar trupat e saj dhe për të riparuar reputacionin e saj të dëmtuar ndërkombëtar”, përfundoi Borrel.
