AVONET monitoron dy tenderë të dyshimtë në spitalet e Pejës dhe Gjilanit
Rrjeti i OJQ-ve AVONET ka kryer një monitorim të dy tenderëve të dyshimtë, një në Spitalin e Pejës dhe tjetri në Spitalin e Gjilanit, të cilët kanë ngjallur shqetësime për mundësinë e keqpërdorimit dhe falsifikimit të dokumenteve.
Në një njoftim për media, AVONET njofton se gjatë shqyrtimit të dosjeve të ofertave të operatorëve ekonomikë, janë zbuluar dokumente që ngjallin dyshime serioze për manipulim. Sipas tyre, dy oferta të dyshuara përfshijnë një CV, një kontratë pune dhe një certifikatë diplome, të cilat janë paraqitur në të dy tenderët pa dijeninë e individëve që figurojnë në këto dokumente.
AVONET thekson se këto gjetje sugjerojnë mundësinë e falsifikimit dhe keqpërdorimit të informacionit për të përfituar nga tenderët publikë, një situatë që rrezikon integritetin dhe transparencën e proceseve të prokurimit publik.
“Personi në fjalë, dizajner i diplomuar, pas kërkesës së AVONET-it për konfirmim, ka deklaruar se nuk ka qenë kurrë në marrëdhënie pune me këtë operator ekonomik dhe se nënshkrimi i tij është përdorur pa autorizim. Kjo përbën një indikacion serioz se A.R.F. SHPK ka përdorur dokumente të falsifikuara në proceset e prokurimit publik, duke cenuar integritetin e procedurave dhe konkurrencën e drejtë”, thotë AVONET.
Duke u bazuar në gjetjet dhe “në dyshimin e arsyeshëm për kryerje veprash penale”, AVONET ka paraqitur kërkesë zyrtare për fillimin e hetimeve pranë Prokurorisë së Shtetit.
Dyshimet e ngritura, sipas kësaj OJQ-je, lidhen me “Deklarim i rremë nën betim”, “Keqpërdorim dhe mashtrim në prokurim publik”, “Keqpërdorim i besimit” si dhe “Falsifikim i dokumenteve”, të parashikuara në Kodin Penal të Republikës së Kosovës.
Po ashtu, AVONET ka kërkuar nga të dy Spitalet që të ndërmarrin veprimet e domosdoshme ligjore për inicimin e procedurave të diskualifikimit pranë Organit Shqyrtues të Prokurimit.
Burimi i lajmit: Gazeta Sinjali
