Arbër Ismajli i ashpër ndaj pushtetit: “Ky pushtet i truqeve dhe intrigave e ka futur Gjilanin në një llucë të stërkeqjes e frustrimit”
Arbër Ismajli i ashpër ndaj pushtetit: “Ky pushtet i truqeve dhe intrigave e ka futur Gjilanin në një llucë të stërkeqjes e frustrimit”
Sa më shumë që po ofrohet dita e zgjedhjeve, 12 tetor 2025, aq më shumë po ashpërsohet gara gjithandej, sikurse që edhe në Gjilan po zhvillohet një debat i ashpër nga oponentët e nominuar për kryetar nga subjekte përkatëse.
Së fundi, gjatë ditës së sotme, kandidati i LDK-së Arbër Ismajli, është shprehur i ashpër ndaj pushtetit në përgjithësi dhe vet qeverisjen lokale në vecanti, duke adresuar kritika të ashpra.
“Ky pushtet është pushtet i ligësisë, ku mendësia e intrigës është bërë pjesë e identitetit të tij!”, ka shkruar mes tjerash z. Ismajli.
Postimi i plotë:
Qytetarë të dashur,
Ky pushtet është pushtet i ligësisë, ku mendësia e intrigës është bërë pjesë e identitetit të tij!
Ka humbur besimin e qytetarëve, ka vrarë shpresën e të rinjve dhe ka lënë pas vetëm papërgjegjësi, kaos e improvizime.
Në vend që të hapë horizonte të reja, ka mbyllur dyer. Në vend që të ndërtojë ura besimi, ka ngritur mure përçarjeje. Në vend që të punojë për të mirën e përbashkët, ka punuar vetëm për interesat e ngushta të klaneve të veta.
Ky pushtet i intrigës ka cenuar dhe goditur çdo vlerë e çdo normë morale, duke e futur shoqërinë tonë në lajthitje. Sot e gjithë ditën prodhon armiq imagjinarë, lufton me mullinjtë e erës dhe shpik kundërshtarë të paqenë.
Ky pushtet ka vetëkonsumuar idenë e bashkimit kombëtar, duke e përdorur në mënyrë të rrejshme vetëm për të ardhur në pushtet.
Ka futur në popullizëm e intriga Rambujen, ka vënë në dyshim pavarësinë e Kosovës, ka manipuluar çështjen e shqiptarëve të Maqedonisë, ka tentuar të fusë “Kalin e Trojës” në Shqipëri dhe ka vënë në terren të rrëshqitshëm shtetet mike të Kosovës anembanë botës.
Ky pushtet i truqeve dhe intrigave e ka futur Gjilanin në një llucë të stërkeqjes e frustrimit. Ka lënduar thellë frymën qytetare, duke e shndërruar Gjilanin dikur qytet të urtësisë dhe demokracisë, në një vend të frustruar e të frikësuar, të mbushur me njerëz të dyshimtë e të panjohur, që shfaqen vetëm kur marrin drejtori dhe institucione për t’i keqqeverisur ato.
Tani, është koha që t’i japim fund këtij realiteti të trishtë dhe të hapim një kapitull të ri për Gjilanin e ri.
