Alain Giresse fton Muharrem Jasharin e FC Drita për ndeshjet e nëntorit, Valon Zymberi: Kjo është shumë pak!
Selektori i Kombëtares së Kosovës, Alain Giresse ka bërë publike listën e lojtarëve për ndeshjet e nëntorit që Kombëtarja A do t’i zhvillojë kundër Armenisë më datë 16 dhe Ishujve Faroe më 19 nëntor.
Në mesin e lojtarëve të ftuar ka disa emra të dëshmuar nga Albi Mall Superliga e Kosovës të cilët për herë të parë gjejnë veten në ‘notesin’ e selektorit.
Numri i lojtarëve të ftuar nga Giresse këtë radhë është shumë më i madh me lojtarë nga Superliga e Kosovës krahasuar me herët e kaluara, mirëpo jo të gjitha ekipet e kanë pritur me entusiazëm vendimin e shefit të bankinës së Kombëtares së Kosovës.
Faqja zyrtare e FC Drita e ka postuar lajmin duke e cilësuar si të mirëpritur vendimin, ku theksohet se tre nga futbollistët e kësaj skuadre janë ftuar në kategori të ndryshme, duke filluar nga Muharrem Jashari – i ftuar te Kombëtarja A; për të vijuar me ftesën adresuar Ardit Tahirit te grupmoshat U-21, e deri te ftesa që i ka arritur në logarinë e tij lojtarit të ri të Akademisë së FC Drita, Eridon Maloku, i cili është ftuar te grupëmoshat e Kombëtares U-19, për ndeshjet që e presin këtë kategori me Ukrainën, Suedinë, respektivisht Qipron, më 17, 20 e 23 nëntor.
Pavarësisht këtyre ftesave, drejtori Sportiv i FC Drita, Valon Zymberi, është ai i cili mendon se ato janë shumë pak për lojtarët e skuadrës së tij, pasi vlerëson se numri i lojtarëve nga kjo skuadër do duhej të ishte më i madh, bazuar – sipas tij, në performancat dhe afinitetet që disponojnë lojtarët.
“Mendoj që ftesat për lojtaret e Superligës janë shumë të rëndesishme për lojtarët dhe për ligën tonë gjithashtu. Personalisht kam pritur që 2-3 lojtarë të ftohen nga klubi ynë për faktin se jemi lider në Albi Mall Superligë, dhe se futbollistët tanë kanë pasur paraqitje të jashtëzakonshme edhe në ligë, sikurse edhe në ndeshjet ndërkombëtare. FC Drita ka merituar të ketë më shumë lojtarë në këto ndeshje. Duke e pa ngritjen e ligës dhe cilësinë e lojtarëve tanë, jam i befasuar për të keq që kaq pak lojtarë janë ftuar”, ka thënë ai.
I pyetur se cilët do të ishin ata futbollistë që sipas tij do duhej të përfshiheshin në listën e selektorit Alen Giresse dhe listat e grupëmoshave eventuale, e cilët do duhej të largoheshin nga ato lista për t’iu liruar vendi, Zymberi nuk ka preferuar të lëshohet me emra të përveçëm, porse është shprehur decidiv se pikërisht ky ka qenë momenti i duhur që selektori të inkorporoj në listën e tij më shumë emra nga Superliga, pasi sipas tij, pikërisht në këto ndeshje miqësore do të mund të shihej më qartë niveli i lojtarëve të Albi Mall Superligës.
“Duke e ditur që këto ndeshje janë më shumë eksperimentale, patjetër që është dashur të ketë më shumë lojtarë nga Superliga. E them me bindje që 2 deri 3 lojtarë nga klubi ynë e kane merituar ftesën. Gjithashtu ka lojtarë që kanë bërë mirë te FC Ballkani, te FC Prishtina, por ka individë edhe në ekipet tjera që kanë treguar nivel të lartë në ligë. Nuk dua të leshohem në emra, por mendoj që është dashur të ketë më shumë lojtarë nga superliga”, përfundoi Zymberi në një deklaratë për Tv Gjilani.
