Aksident me fatalitet në Graçanicë – këmbësori humb jetën pasi goditet nga vetura, shoferi dërgohet në mbajtje
Një aksident i rëndë komunikacioni me pasoja fatale ka ndodhur mbrëmjen e së martes në Graçanicë, ku një këmbësor ka humbur jetën pasi është goditur nga një automjet.
Ngjarja ka ndodhur më 23 dhjetor 2025, rreth orës 23:30, në rrugën “Car Lazar”, konkretisht përball Shtëpisë së Kulturës në Graçanicë. Sipas informatave, në aksident janë përfshirë një veturë e tipit VW Golf, ngjyrë hiri, dhe një këmbësor.
Burimet bëjnë të ditur se vetura drejtohej nga M. M, ndërsa viktima ishte Z. P. Këmbësori ka pësuar lëndime të rënda trupore dhe fillimisht është dërguar me një automjet civil në Spitalin e Graçanicës, prej nga më pas është transferuar me autoambulancë në QKUK – Emergjente në Prishtinë. Megjithatë, mjekët kanë konstatuar se viktima kishte mbërritur pa shenja jete.
Në vendin e ngjarjes kanë dalë njësitë policore, mbikëqyrësi i ndërrimit si dhe njësia e Hetimeve të Komunikacionit Rrugor, të cilët kanë kryer këqyrjen e vendit të ngjarjes. Po ashtu, në vendin e ngjarjes ka dalë edhe Prokurori kujdestar i Shtetit.
Me vendim të Prokurorit, trupi i pajetë i viktimës është dërguar në Institutin e Mjekësisë Ligjore për obduksion, ndërsa shoferi i automjetit është dërguar në mbajtje.
Rasti po hetohet nga organet kompetente.
