Admirali më i lartë i NATO-s: Po shqyrtojmë një goditje parandaluese ndaj Rusisë
NATO po shqyrton marrjen e një qasjeje më “agresive” si përgjigje ndaj sulmeve kibernetike, sabotimeve dhe shkeljeve të hapësirës ajrore nga Rusia, ka deklaruar zyrtari më i lartë ushtarak i Aleancës. Admirali Giuseppe Cavo Dragone, kryetar i Komitetit Ushtarak të NATO-s, konfirmoi se aleanca perëndimore po studion mundësinë e forcimit të reagimit të saj ndaj luftës hibride që po zhvillon Moska, shkruan Financial Times.
“Po i shqyrtojmë të gjitha opsionet… Sa i përket hapësirës kibernetike, aktualisht jemi mjaft reaktivë. Të bëhesh më agresiv, ose proaktiv në vend se reaktiv, është diçka për të cilën po mendojmë”, tha Dragone.
Evropa ka qenë e goditur nga një sërë incidentesh të luftës hibride — nga ndërprerja e kabllove në Detin Baltik deri te sulmet kibernetike në mbarë kontinentin — disa prej të cilave i atribuohen Rusisë, ndërsa për të tjerat ende nuk është përcaktuar origjina.
Për këtë arsye, disa diplomatë, veçanërisht nga vendet e Evropës Lindore, po kërkojnë që NATO të mos mbetet vetëm reaktive, por të fillojë të kundërpërgjigjet. Një reagim i tillë do të ishte më i realizueshëm në fushën e sulmeve kibernetike, ku shumë shtete tashmë disponojnë kapacitete ofensive, ndërsa do të ishte dukshëm më kompleks kur bëhet fjalë për sabotime apo depërtime me dronë.
Goditja parandaluese si veprim mbrojtës?
Dragone theksoi se një “goditje parandaluese” në disa raste mund të konsiderohej një “veprim mbrojtës”, por shtoi: “Kjo është përtej mënyrës sonë të zakonshme të mendimit dhe veprimit.”
Megjithatë, ai la të hapur mundësinë e ndryshimit të qasjes. “Të jesh më agresiv në krahasim me agresionin e kundërshtarit mund të jetë një opsion. Pyetjet që ngrihen janë: cili është kuadri ligjor, cili është kuadri juridiksional, dhe kush do ta ndërmarrë këtë?”, shtoi ai.
Suksesi i misionit në Baltik
Si shembull të suksesit në parandalim, NATO përmend misionin Baltic Sentry, në kuadër të të cilit anije, avionë dhe dronë detarë patrullojnë Detin Baltik. Misioni ka ndaluar përsëritjen e incidenteve të shumta të ndërprerjes së kabllove që ndodhën gjatë viteve 2023 dhe 2024, për të cilat dyshohet se qëndrojnë pas anije të lidhura me të ashtuquajturën “flotë hije” të Rusisë, e krijuar për të shmangur sanksionet perëndimore.
“Që nga nisja e misionit Baltic Sentry, nuk ka pasur asnjë incident. Kjo do të thotë se parandalimi po funksionon”, theksoi Dragone.
