Në moshën 25-vjeçare, Erion Morina doktoron në Matematikë në Austri, suksesin ia kushton prindërve të tij nga Kosova
Një histori frymëzuese suksesi vjen nga diaspora shqiptare në Austri. Erion Morina ka përfunduar me sukses studimet e doktoratës (PhD) në Matematikë në Universitetin e Graz-it, duke u bërë doktor i shkencave në moshën vetëm 25-vjeçare.
Lajmin e ka bërë të ditur vetë Morina përmes një postimi në rrjetet sociale, ku, krahas gëzimit për këtë arritje, ka shprehur mirënjohje të thellë për të gjithë ata që e mbështetën në rrugëtimin e tij akademik.
“Përfundova doktoraturën në matematikë. Më në fund e zgjidha ‘x’-in, por nuk do ta kisha arritur pa konstantet e jetës sime – familjen, miqtë dhe mentorin tim”, ka shkruar ai me humor.
Një falënderim të veçantë Morina ia kushtoi mentorit të tij, profesorit Martin Holler, për udhëheqjen, besimin dhe lirinë akademike që i ofroi gjatë viteve të studimeve, duke theksuar se mbështetja e tij ishte vendimtare në tejkalimin e sfidave kërkimore.
Ai shprehu mirënjohje edhe për profesorët, kolegët dhe miqtë e departamentit, të cilët, sipas tij, e bënë ambientin universitar një vend ku jo vetëm zhvillohej shkenca, por ndërtoheshin edhe miqësi të sinqerta.
Në postimin e tij, Morina nuk harroi të falënderonte as shkollën Bundesgymnasium Kapfenberg dhe profesorët që e mbështetën në hapat e parë të formimit akademik, duke i mundësuar përfundimin e maturës në moshën 16-vjeçare.
Megjithatë, pjesa më prekëse e mesazhit të tij iu kushtua familjes, veçanërisht prindërve, të cilët u detyruan të largoheshin nga Kosova gjatë luftës dhe ta rindërtonin jetën e tyre në Austri.
“Ju ishit në moshën që kam unë sot kur lufta në Kosovë ju detyroi të hiqnit dorë nga gjithçka – nga karrierat tuaja, diplomat dhe e ardhmja që kishit ndërtuar – për t’u dhënë fëmijëve tuaj një jetë me shpresë. Arritët pa asgjë dhe e ndërtuat jetën nga e para. Këtë punim jua kushtoj juve”, shkroi ai.
Ai falënderoi gjithashtu motrën Edita dhe vëllanë Agon për mbështetjen e vazhdueshme gjatë gjithë rrugëtimit të tij.
Suksesi i Erion Morinës përfaqëson një arritje të rëndësishme jo vetëm në planin akademik, por edhe një dëshmi se përkushtimi, puna e palodhur dhe sakrificat familjare mund të shndërrohen në histori frymëzuese suksesi. Në moshën 25-vjeçare, ai është një shembull i jashtëzakonshëm për të rinjtë shqiptarë, brenda dhe jashtë vendit.
