“Kupa e Anamoravës 2026” mbyll edicionin e parë me sukses, nxënës nga tri shtete garuan në Kamenicë
Në Kamenicë është përmbyllur me sukses edicioni i parë i Olimpiadës Rajonale të Matematikës “Kupa e Anamoravës 2026”, një aktivitet arsimor që mblodhi 65 nxënës të dalluar nga Gjilani, Kamenica, Vitia, Novobërda, Presheva, Bujanoci, Kumanova dhe Shkupi.
Gara kishte për qëllim promovimin e dijes, zhvillimin e mendimit logjik dhe identifikimin e talenteve të reja në matematikë. Pjesëmarrësit patën rastin të testojnë njohuritë e tyre dhe të shkëmbejnë përvoja me bashkëmoshatarë nga treva të ndryshme shqiptare.
Ceremonia e ndarjes së çmimeve u mbajt në prani të përfaqësuesve të institucioneve arsimore dhe organizatorëve. Të pranishëm ishin kryetari i Shoqatës së Matematikanëve të Gjilanit, Bregan Isufi, drejtori i Arsimit në Kamenicë, Selami Klaiqi, drejtori i Arsimit në Gjilan, Jeton Rexhepi, si dhe kryetari i Degës së Shoqatës së Matematikanëve të Gjilanit në Kamenicë, Agon Mahmuti.
Përfaqësuesit institucionalë vlerësuan lart nivelin e organizimit dhe rezultatet e nxënësve, duke theksuar rëndësinë e mbështetjes së të rinjve të talentuar në fushën e shkencës dhe arsimit.
Drejtori i Arsimit në Kamenicë, Selami Klaiqi, përgëzoi pjesëmarrësit dhe fituesit, duke theksuar se investimi në arsim dhe në talentet e reja mbetet një ndër prioritetet kryesore për të ardhmen.
Në kategorinë e parë, vendi i parë iu takoi Arbër Rrahmanit nga Kumanova, vendi i dytë Unik Kryeziut nga Gjilani, ndërsa vendi i tretë Anik Spahiut nga Kamenica.
Në kategorinë e dytë, fitues u shpall Amar Hismoni nga Gjilani, vendi i dytë shkoi për Diell Misinin nga Vitia, ndërsa vendi i tretë për Elea Hajrullahun nga Gjilani.
Edicioni inaugurues i “Kupës së Anamoravës” u vlerësua si një hap i rëndësishëm drejt krijimit të një tradite të re të garave matematikore në rajon, duke promovuar ekselencën akademike dhe bashkëpunimin ndërmjet nxënësve nga vise të ndryshme shqiptare.
