Studentët e Universitetit Publik “Kadri Zeka” shkëlqejnë në Ligën Universitare në Futsall
Studentët e Universiteti Publik “Kadri Zeka” vazhdojnë të dëshmojnë sukses dhe përkushtim jo vetëm në aspektin akademik, por edhe në aktivitetet sportive universitare, duke arritur rezultate mbresëlënëse në Ligën Universitare në Futsall.
Studentët, Bledian Kryeziu, Aris Ismajli, Almir Islami, Ensar Islami, Art Muja, kanë përfaqësuar universitetin në Ligën Universitare në Futsall, duke u renditur ndër ekipet më të mira universitare në Kosovë.
Nga gjithsej 32 ekipe pjesëmarrëse, ekipi i Universitetit Publik “Kadri Zeka” ka siguruar kualifikimin në fazën Play-Off, duke hyrë në mesin e 16 ekipeve më të mira universitare në Kosovë. Ajo që e bën edhe më të veçantë këtë sukses është fakti se ekipi i Universitetit Publik “Kadri Zeka” e përfundoi fazën e grupeve në vendin e parë, duke dominuar me lojë cilësore, organizim të shkëlqyer dhe shpirt garues në çdo ndeshje.
Një emër që mori vëmendje të veçantë gjatë javës së tretë të Ligës Universitare ishte studenti Bledian Kryeziu, i cili u shpall lojtari më i dalluar i javës nga të gjitha ekipet universitare pjesëmarrëse. Me performancë brilante dhe paraqitje mbresëlënëse në fushë, ai arriti të realizojë 3 gola spektakolarë, duke qenë protagonisti kryesor në suksesin e ekipit të UKZ-së.
Ky sukses është dëshmi e përkushtimit, talentit dhe punës ekipore të studentëve të Universitetit Publik “Kadri Zeka”, të cilët vazhdojnë ta prezantojnë universitetin me krenari në arenën sportive universitare.
Suksesi i tyre është frymëzim për studentët e tjerë dhe një promovim i denjë i vlerave sportive, bashkëpunimit ekipor dhe përkushtimit që karakterizon studentët e Universitetit Publik “Kadri Zeka”.
