SHBA: Drejtori i Arsimit në Gjilan viziton “Sioux City Career Academy”, fokusi te arsimi profesional dhe tregu i punës
Drejtori i Drejtorisë Komunale të Arsimit në Gjilan, Jeton Rexhepi, i cili ndodhet për vizitë zyrtare në Shtetet e Bashkuara të Amerikës, vizitoi sot “Sioux City Career Academy” në shtetin e Iowas, një institucion i njohur për qasjen moderne në arsimin profesional dhe teknik.
Gjatë vizitës, drejtori Rexhepi u njoh nga afër me organizimin e akademisë, programet profesionale dhe mënyrën e integrimit të nxënësve në tregun e punës përmes praktikës profesionale dhe bashkëpunimit të ngushtë me bizneset lokale.
Në kuadër të kësaj akademie funksionojnë shumë drejtime profesionale që u ofrojnë nxënësve mundësi konkrete për punësim.
Theks i veçantë iu kushtua modelit të ndërlidhjes së arsimit me nevojat reale të tregut të punës dhe përgatitjes së nxënësve për sfidat e së ardhmes.
Gjatë takimeve u diskutuan edhe mundësitë e bashkëpunimit dhe shkëmbimit të përvojave në fushën e arsimit profesional, me synim avancimin e cilësisë së arsimit dhe krijimin e mundësive më të mira për të rinjtë tanë.
