Kosova dhe Shqipëria do të organizojnë Kampionatin Evropian U16 për djem në 2027
Konfederata Evropiane e Volejbollit (CEV) ka miratuar unanimisht kandidaturën e përbashkët të Kosova dhe Shqipëria për organizimin e Kampionatit Evropian U16 për djem, që do të mbahet gjatë verës së vitit 2027. Vendimi u konfirmua përmes një letre zyrtare nga presidenti i CEV-it, Roko Sikiric, drejtuar krerëve të federatave përkatëse, Bahri Gjinovci dhe Erlind Pëllumbi.
Turneu do të zhvillohet në Prishtinë dhe Tiranë, ndërsa finalja e madhe do të luhet në kryeqytetin kosovar. Në garë do të jenë 16 kombëtare nga e gjithë Evropa, duke kthyer rajonin në një qendër të rëndësishme të volejbollit të të rinjve dhe duke nxjerrë në pah talentet më premtuese të kontinentit.
Ky vendim vjen pas suksesit të organizimit të Kampionatit Evropian U16 për vajza më 2026, që u vlerësua lartë nga institucionet evropiane të volejbollit. Bashkëpunimi mes dy federatave dhe standardi i lartë organizativ i Kosovës dhe Shqipërisë i japin CEV-it besimin për t’u dhënë përsëri këtë mundësi.
Kampionati i djemve do të ofrojë një skenë ku yjet e së ardhmes do të kenë mundësinë të tregojnë potencialin e tyre dhe të hedhin hapat e parë drejt një karriere ndërkombëtare.
