Arta Haziri Nuhiu, pjesë e panelit të jurisë vlerësuese në festivalin e muzikës ”Tallin Voice 2026”
Organizata Kulturore “Mollëkuqet” ka njoftuar se drejtoresha e saj, Arta Haziri Nuhiu ka marrë ftesë të jetë pjesë e panelit vlerësues në festivalin “Tallin Voice 2026”.
Ftesa është pritur me mirënjohje të theksuar për organizatorin ndërsa është vlerësuar lart pjesëmarrja e Kosovës në këtë nivel përfaqësimi, duke pasur parasysh peshën dhe rëndësinë e nivelit professional dhe organizativ të festivalit prestigjioz që mbahet në kryeqytetin e Estonisë.
“Organizata Kulturore-Artistike “Mollekuqet” ka kënaqësinë të njoftojë opinionin e gjerë se drejtoresha e saj, Arta Haziri Nuhiu, është ftuar të jetë pjesë e Panelit të Jurisë në Festivalin Ndërkombëtar të Muzikës “Tallinn Voice 2026”, i cili do të mbahet nga data 1–3 Maj 2026, në Tallinn, Estoni”, shkruan faqja zyrtare e Organizatës “Moillëkuqet”.
Po aty theksohet se kjo përbënë një moment të rëndësishëm, pasi Kosova për herë të parë do të përfaqësohet me një delegacion zyrtar në këtë garë prestigjioze ndërkombëtare, duke dëshmuar talentin, profesionalizmin dhe potencialin artistik në skenën evropiane.
“Pjesëmarrja e znj. Arta Haziri Nuhiu në juri është një vlerësim i madh për punën e saj shumëvjeçare në promovimin e kulturës dhe artit shqiptar, si dhe një hap i rëndësishëm drejt fuqizimit të artistëve të rinj kosovarë në arenën ndërkombëtare”, thuhet më tej në njoftim.
Organizata “Mollekuqet” me këtë rast ka falënderuar të gjithë bashkëpunëtorët dhe mbështetësit, duke e përgëzuar delegacionin kosovar që do të përfaqësojë me dinjitet vendin në këtë festival të nivelit të lartë.
