Kryetari Rahimaj në Zvicër, merr pjesë në turnirin e organizuar nga Shoqata Humanitare “Koretini”
Kryetari i Komunës së Kamenicës Kadri Rahimaj përgjatë këtij vikendi ka qenë në vizitë në Zvicër.
Ai atje në mesin e takimeve të shumta me diasporën kamenicase, ka marrë pjesë edhe në turnirin e dytë të futbollit të vogël që është organizuar nga Shoqata Humanitare “Koretini”.
Ai ka qenë i shoqëruar nga Zëvendësministrja e Punëve të Jashtme dhe Diasporës Liza Gashi si dhe nga Konsulli i Konsulatës së Republikës së Kosovës në Zvicër Vigan Berisha.
Në kuadër të këtij turniri ka pasur gjithsej 20 ekipe të ndryshme që kanë luajtur për çmimin final. Ekipe që vijnë edhe nga shoqata të tjera të Komunës së Kamenicës.
Ekipi fitues është shpallur ekipi “HAVERAT”.
Këtë aktivitet e ka përshëndetur Kryetari Rahimaj duke falenderuar Shoqatën për kontributin që ka dhënë deri më tani në Komunën e Kamenicës si dhe për aktivitetin e organizuar.
Në këtë turne i pranishëm ka qenë edhe ish-sulmuesi i Kombëtares së Zvicrës njëherit lojtari i parë shqiptar që ka luajtur për këtë kombëtare, Milaim Rama.
Në turnir të pranishëm kanë qenë edhe Milaim Limoni nga OVL-UÇK në Kamenicë, Kryetari i Shoqatës “Topanica” në Zvicër Burhan Morina si dhe Dashnim Hebibi, Kryetar i Shoqatës “Lugina e Preshevës” në Zvicër.
Ngjarje të tilla bëjnë bashkë diasporën kamenicase, si dhe specifikojnë edhe një herë rëndësinë për kontributin në vendlindje, diçka që diaspora jonë e ka dëshmuar me vite.
