Gjilani merr tri pikë të rëndësishme në udhëtim ndaj Drenicës
Gjilani ka shënuar fitore me rezultat 1-0 në udhëtim ndaj Drenicës në Skenderaj në kuadër të javës së 15-të në elitën e futbollit kosovar.
Pjesa e parë e takimit ishte e qetë me të dyja skuadrat që po mbronin mirë hapësirat duke mos lejuar njëra-tjetrën të rrezikojnë.
Në pjesën e dytë ritmi i ndeshjes filloi të ngritej, por në fund ishin mysafirët ata që ia dolën të largohen nga ‘Bajram Aliu’ me pikët e plota.
Po luhej minutë e 80-të e takimit kur Gjilani ia doli të realizojë golin që i dha pikët e plota në këtë ndeshje.
Autor i golit ishte sulmuesi Senad Jarovic i cili pasi kaloi edhe portierin Kenan Haxhihamza ia doli të realizojë për 1-0.
Me këtë fitore Gjilani shkon në kuotën e 19 pikëve dhe aktualisht mban pozitën e shtatë në tabelë, ndërsa Drenica renditet e teta me 18 sosh.
