KQZ sqaron procedurat e votimit me postë për qytetarët jashtë Kosovës
Të shtunën në mesnatë ka përfunduar afati 38-ditor për regjistrimin e votuesve jashtë Kosovës që dëshirojnë të votojnë me postë në zgjedhjet lokale për kryetarë dhe kuvende komunale. Kjo procedurë vlen vetëm për votuesit jashtë Kosovës që janë regjistruar për votim përmes postës.
Zëdhënësi i KQZ-së, Valmir Elezi, theksoi se periudha për votim me postë është e kufizuar dhe fillon më 17 shtator, duke përfunduar më 11 tetor. Ai sqaroi gjithashtu se në këto zgjedhje nuk ka votim në përfaqësi diplomatike, por vetëm përmes postës.
“Periudha e votimit përmes postës vlen vetëm për votuesit jashtë Kosovës që janë regjistruar për votim përmes postës në periudhën 23 korrik – 29 gusht 2025. Votimi përmes postës do të fillojë më 17 shtator dhe do të përmbyllet më 11 tetor. Pra, sipas Ligjit për Zgjedhjet e Përgjithshme, në Zgjedhjet Lokale nuk ka votim në përfaqësi diplomatike, por vetëm përmes postës”, deklaroi Elezi.
Ai theksoi se KQZ-ja do të sigurojë që çdo votues jashtë vendit të marrë pakon me dy fletëvotime, ndërsa është përgjegjësi e secilit që ta dërgojë këtë paketë në kutitë postare të KQZ-së, që janë të vendosura si jashtë vendit, ashtu edhe në Kosovë.
