Drejtori Isufi: Po evidentohen dëmet që u shkaktuan nga breshëri dhe stuhia
Pasditja e së premtes në disa fshatra të Komunës së Gjilanit, u karakterizua me stuhi të fuqishme dhe breshër, duke shkaktuar dëme në kultura bujqësore.
Drejtori i Bujqësisë, Bajram Isufi, ka parë nga afër dëmet e shkaktuara.
Sipas tij pjesët më të prekura nga breshëri pas vizitave në terren janë fshati: Lladovë, Zhegër dhe Nasalë.
“Nga kjo fatkeqësi natyrore kanë pësuar kulturat e ndryshme bujqësore”, tha Isufi.
Ai tregoi se një nga fermerët që ka pësuar tepër rëndë nga breshëri është Alban Sherifi nga fshati Lladovë, ku ka të dëmtuar kulturat bujqësore si grurin, misrin, shalqirin dhe kungujt.
“Ne si drejtori së bashku me Komisionin Komunal, do t’i evidentojmë dëmet, pastaj kërkesat për kompensim do t’i adresojmë tek Agjencia e Menaxhimit të Emergjencave”, tha drejtori i Bujqësisë Bajram Isufi.
Ndërsa fermeri Alban Sherifi tha: “Me vëllezërit kemi investuar shumë, i kemi mbjellë me mund kulturat bujqësore dhe për disa minuta i gjithë mundi u shkatërrua, në veçanti shalqiri”.
