Votimet në Shqipëri, test për rrugën drejt BE-së
Shqiptarët u drejtohen kutive të votimit sot për zgjedhjet parlamentare të cilat shihen si vendimtare për të matur zhvillimin demokratik të vendit dhe për ta përcaktuar synimin e madh për një të ardhme evropiane.
Në zgjedhje – ku për herë të parë do të votojnë edhe shqiptarët në mërgim – do të përballen kryeministrin në largim, Edi Rama, dhe kundërshtari i tij i përbetuar Sali Berisha, një politikan i djathtist që kryeson një aleancë të partive opozitare.
Rama, 60 vjeç, është lider i Partisë Socialiste që nga viti 2005 dhe është duke e kërkuar mandatin e katërt me radhë, diçka e paparë, me premtimin për ta anëtarësuar vendin në Bashkimin Evropian deri në vitin 2030.
Ai thotë se dyert e Brukselit janë çelësi “për t’u dhënë shqiptarëve një pasaportë evropiane” dhe t’u mundësosh atyre “të përfitojnë nga të drejtat e njëjta sikurse qytetarët e të gjitha vendeve të tjera evropiane.”
Ai që do të përpiqet ta ndalë Ramën është Berisha, 80 vjeç, i cili është i etur për t’u kthyer në pushtet pas 12 vjetësh.
Ish-presidenti udhëheq koalicionin opozitar që ka marrë një slogan të ngjashëm me atë të Donald Trumpit, “Shqipëria e Madhe”, bazuar në ringjallje ekonomike.
“Ne jemi të vetmit që mund ta rivendosim ekonominë e vendit, të vetmit që mund ta çojmë Shqipërinë përpara. Edi Rama po numëron ditët e fundit të regjimit të tij”, tha Berisha.
Fushata gjithashtu i jep atij mundësinë që ta rifreskojë imazhin e tij si një lider i fortë, pavarësisht se është nën vëzhgimin e drejtësisë shqiptare, sepse dyshohet se është i përfshirë në një çështje ku ka përfituar familja e tij.
Pak para përfundimit të një fushate të shënuar nga teprime verbale, veçanërisht në rrjetet sociale, sondazhet e fundit tregonin fitore për partinë e Ramës.
Organizata për Siguri dhe Bashkëpunim në Evropë, ndërkohë, tha se ka “polarizim ekstrem politik” në këtë vend ballkanik me 2.8 milionë banorë.
Berisha akuzon socialistët për “blerje votash, frikësim, presion, përdorim të fondeve publike nga ministrat dhe kandidatët e shumicës për fushatën e tyre elektorale”.
Rama i ka hedhur poshtë këto pretendime duke i quajtur “asgjë më shumë se një justifikim për humbjen”.
Drejtësia
Për herë të parë në historinë e zgjedhjeve në Shqipëri, shqiptarët jashtë vendit ka mundësinë të votojnë në vendet ku jetojnë përmes postës, si një provë për zhvillimin e proceseve dhe institucioneve demokratike, posaçërisht në kontekstin e negociatave për anëtarësim në BE, të cilat filluan në vitin 2022.
Sipas të dhënave zyrtare nga Komisioni Qendror i Zgjedhjeve, 245.935 shqiptarë jashtë vendit janë të regjistruar për të votuar.
“Shqipëria ka bërë një përparim të ndjeshëm në rrugën drejt BE-së, duke treguar këmbëngulje në zbatimin e reformave ambicioze për të mirën e qytetarëve”, tha për AFP-në Silvio Gonzato, ambasador i delegacionit të BE-së në Shqipëri.
Humbësit kanë kontestuar rezultatet e secilës palë të zgjedhjeve që prej përfundimit të komunizmit në fillim të viteve të ‘90-ta, duke pretenduar për manipulime.
Por, kësaj here, votimi po vëzhgohet nga afër dhe për herë të parë në terren do të angazhohen punonjës civilë dhe zyrtarë ligjorë, krahas komisionit zgjedhor dhe rreth 300 vëzhguesve ndërkombëtarë.
Ndërkohë, Prokuroria e Posaçme kundër Korrupsionit dhe Krimit të Organizuar sapo ka hapur një procedurë verifikimi për një kontratë prej 6 milionë dollarësh të nënshkruar në prill mes një fondacioni të komunitetit shqiptaro-amerikan në Shtetet e Bashkuara të Amerikës dhe firmës lobuese amerikane “Strategjia Kontinentale”.
“Strategjia Kontinentale” u themelua nga Carlos Trujillo, një këshilltar i lartë i Trumpit.
Sipas Partisë Demokratike “kontrata synon të forcojë marrëdhëniet midis Shteteve të Bashkuara dhe Partisë Demokratike”.
Për Brukselin, votimi i së dielës është një test i madh i ri për Shqipërinë, e cila është anëtare e NATO-s prej vitit 2009.
“Organizimi i zgjedhjeve të lira dhe të ndershme, në përputhje me normat dhe vlerat demokratike, do të jetë një hap thelbësor për të forcuar demokracinë shqiptare, për të rritur besimin e qytetarëve tek përfaqësuesit e zgjedhur dhe për të avancuar integrimin evropian të vendit”, tha Gonzato.
Vetëm pesë ditë pas zgjedhjeve, Tirana do të jetë mikpritëse e samitit të radhës të Komunitetit Politik Evropian.
