Prishtina ‘shkatërron’ Vëllaznimin dhe kalon në gjysmëfinale të Kupës së Kosovës
Prishtina ka fituar me rezultat 0-4 në udhëtim te Vëllaznimi në kuadër të çerekfinale së Kupës së Kosovës, duke siguruar kështu kualifikimin në gjysmëfinale.
Klubi kryeqytetas ka siguruar një vend në gjysmëfinale të Kupës së Kosovës, duke qenë një nga katër ekipet që synon trofeun, i cili mund t’i dërgoj në garat evropiane.
Pjesa e parë e ndeshjes u karakterizua me lojë thuajse të barabartë, por me vetëm mysafirët që gjeten rrugën e rrjetës.
Në fakt, vendasit shënuan fillimisht me Osman Mëziun, gol i cili u anulua nga VAR-i, ndërsa Najeeb Jakubu (17’) shënoi golin e epërsisë së Prishtinë 0-1.
Në pjesën e dytë, Prishtina ishte dukshëm skuadër më e mirë duke shenuar edhe tri gola dhe duke siguruar një fitore të madhe.
Goli i parë në këtë pjesë erdhi në minutën e 59-të me anë të Ramiq Bytyqit, i cili shënoi për 0-2, ndërsa në minutën e 68-të shënoi Ron Raçi për 0-3.
Në minutën e 82-të erdhi edhe goli i fundit me anë të Alban Shiollvës që shënoi për rezultatin përfundimtar 0-4.
