Ekipi olimpik i Kosovës i përfundon Lojërat Olimpike me dy medalje
Ekipi olimpik do të kthehet në Kosovë me dy medalje olimpike nga nëntë të mundshme nga Lojërat Olimpike, pasi Hana Beiqi dhe Gresa Bakraçi ishin atletet e fundit kosovare që garuan në Paris 2024. Të dyja u eliminuan në rrethet e para në garat e tyre përkatëse në Paris.
Notarja 15-vjeçare doli e fundit në baterinë e saj, me kohën 27.34 sekonda, pamjaftueshëm për ta siguruar një vendin në mesin e 16 më të mirëve. Ky ishte debutimi i saj në Lojëra Olimpike.
Ndërsa, Bakraçi, u diskualifikua nga gara në 800 metra vrapim, pasi theu rregullat duke e shkurtuar rrugën e vrapimit, pasi doli para kohe nga korsia e saj.
Përveç Beiqit dhe Bakraçit, medalje nuk arritën të fitojnë as Adell Shaboviq, Nora Gjakova, Akil Gjakova, Loriana Kuka dhe Donjeta Sadiku.
Por, ekipi olimpik do të kthehet në Kosovë me dy medalje olimpike nga kjo Olimpiadë, pasi Distria Krasniqi e fitoi medaljen e argjendtë në kategorinë deri në 52 kilogramë në xhudo, ndërsa Laura Fazliu e fitoi medaljen e bronztë në debutimin e saj. Fazliu triumfoi në kategorinë deri në 63 kilogramë për ta fituar medaljen e parë olimpike në karrierë.
Ndërkohë, drejtuesit e KOK-ut, presidenti Ismet Krasniqi dhe sekretari i përgjithshëm, Besim Aliti, kanë takuar të premten në Paris, ekipin olimpik të xhudos në krye me kryetarin e FXHK-së, Agron Kuka dhe trajnerin, Driton Kuka.
“Presidenti ka përgëzuar edhe një herë ekipin e xhudos për suksesin e arritur në Paris 2024, duke fituar dy medalje olimpike, e që është vazhdimësi e sukseseve të njëpasnjëshme në Lojërat Olimpike. Palët kanë biseduar edhe për mundësi tjera të bashkëpunimit dhe përkrahjes për ekipin e xhudos, që po e bënë krenarë gjithë Kosovën me sukseset e arritura”, thekson KOK-u.
Kosova udhëtoi për në Paris me nëntë atletë në sporte si, xhudo, not, atletikë dhe boks.
Kosova ka debutuar për herë të parë në vitin 2016 në Olimpiadën e Rios në Brazil dhe prej atëherë i ka fituar pesë medalje olimpike, tri të arta, një të argjendtë dhe një të bronztë, që të gjitha në xhudo.
