Shkruan: Sabit Rrustemi: – Tri dekada të revistës letrare-kulturore “Agmia”
Këtu e tridhjetë vite më parë, nisi rrugëtimin Revista Letrare – Kulturore “Agmia”, dhe atë, pikërisht në 10-vjetorin e rënies heroike të Rexhep Malës e Nuhi Berishës, tash, që të dy, heronjë të Kosovës.
Atë kohë, rrethanat e shënimit të atij përvjetori ishin ndryshe nga ky 40-vjetor flijimi i këtyre dy heronjve, për lirinë e Kosovës.
Shkruan: Sabit Rrustemi
Ishte edicioni i tretë e Manifestimit kombëtar të kulturës, “Flaka e Janarit”, që ua përkushtoi një tribunë përkujtimore, ku referuan, Ahmet Isufi, Hydajet Hyseni, Basri Musmurati, Xhelil Pajaziti dhe Enver Topalli.
Kjo tribunë e mbajtur, natyrisht u përcoll thuaja e plotë, në numrin e parë të revistës letrare “Agmia”, nën titullin e përbashkët, “Dy jetëra në një ideal”, të cilin e udhëhoqa po dhe e përgatita për botim.
Do theksuar, meqë në 40-vjetorin e rënies së këtyre dy heronjëve, revista letrare – kulturore AGMIA shënon 30-vjetorin e saj, se për numrin e parë të kësaj reviste u përkujdes shkrimtari ynë i shquar, Beqir Musliu, i cili shkroi dhe editorialin, ndërsa dizajnin dhe realizimin kompjuterik e bëri poashtu një shkrimtar i njohur yni, tashmë i ndjerë, Abdullah Konushevci, kurse ballinën e punoi ( atë që e ka dhe sot në numrin e saj të 41-të), piktori preshevar, Ismet Jonuzi.
Numri i parë i kësaj reviste, përpos krijimeve të shpërblyera të konkursit anonim letrar, “Flaka e Janarit” 1994, solli dhe një informacion të thuktë për nismën e këtij Manifestimi, dy vite më parë, nën titullin, “Udha e një manifestimi”, një shkrim në formë reportazhi për edicionin e tretë nga poeti Avdush Canaj, me titull, “Martirët nuk vdesin’, pastaj një informacion të plotë për krijimet e konkursit anonim letrar si dhe Orën e madhe letrare, nga gazetari Hasan Bunjaku, nën titullin, “Tregimet mbi nivelin e poezive”, ku fitues të vendeve të para ishin, Ramadan Mehmeti, poezia e të cilit, “Kosovë i thonë Gjilan”, që u lexua në Orën e madhe letrare, u shpall më e mira, ndërsa fitues i konkursit anonim letrar për tregim ishte Xhemail Halili (tash Xhemë Karadaku) , i cili zuri vendin e parë, Naser Zymberi, vendin e dytë dhe, Iljaz Prokshi, vendin e tretë.
Për poezi, u patën ndarë dy vende të treta si dhe një sosh u përzgjodhën për botim në atë numër të asaj reviste, e cila mbeti deri në ditët e sotme përcjellësja më besnike e këtij Manifestimi.
Numri i parë i asaj reviste u përmbyll me tri kronika kulturore nga Manifestimi, përkatësisht, me një shkrim për pjesët skenike nga Hasan Bunjaku, një për pjesën e artit pamor nga tashmë i ndjeri, Demir Behluli si dhe dhe një kronikë kulturore për pjesën muzikore nga Izet Kallaba.
Në përgatitjen e numrit të parë të revistës AGMIA, e cila atë kohë e botoi Shoqata e Pavarur Kulturore dhe Forumi i Rinisë i LDK – Dega në Gjilan, ndihmuan edhe Hasan Bunjaku, Miradije Ramiqi, Nevzat Isufi, Ramadan Mehmeti, Shefik Shkodra e Avdush Canaj.
Numri i parë i revistës AGMIA u pat shtypur në shtypshkjronjën e asaj kohe EUROGRAPHIG të Prishtinës.
