Vërshimet në Pejë, uji rrëmben automjetet – vozitësi shpëton duke dalë nga dritarja e veturës
Reshjet e dendura të shiut gjatë mbrëmjes së sotme në Pejë, kanë vërshuar rrugët e këtij qyteti dhe kanë rrezikuar qarkullimin e qytetarëve.
Uji i rrëmbyeshëm me vëllim të madh nëpër rrugë, përveç që ka pamundësuar qarkullimin, ka bartur edhe automjetet.
Në pamjet që ka siguruar Telegrafi shihet se si uji bart automjetet. Ndërsa një vozitës, për të shpëtuar nga uji, ka dalë nga dritarja e veturës që e kishte rrëmbyer vala e ujit në rrugë.
Nga Komuna e Pejës, i kanë thënë Telegrafit se zonat me të rënduara nga vërshimet janë qendra e qytetit, rruga ‘7 shtatori’ si dhe pjesa te Stacioni Trenit, raporton Telegrafi.
Bëhet e ditur se uji ka depërtuar edhe nëpër objekte dhe bodrume të shtëpive.
Besim Aliu, nga Instituti Hidrometeorologjik ka thënë se edhe gjatë ditës së diel pritet të mbajë mot i ngjashëm, dhe se gjatë orëve të pasdites do të këtë shkarkime rrufesh.
“ Reshje kemi pasur dhe në shumë vende të Kosovës. Por me intensitet më të ulët. Nesër parashihet mot i ngjashem, ndërsa pasdite me shkarkime rrufesh”, ka thënë Aliu. /Telegrafi/
