Rrahje në Spitalin e Pejës, dyshohet se mjeku sulmoi fizikisht punëtorin
Një rrahje ka ndodhur të hënën në Spitalin e Përgjithshëm në Pejë, ndërkaq dyshohet se një mjek ka sulmuar fizikisht një punëtor të këtij institucioni shëndetësor.
Lajmin e konfirmoi zëdhënësi i Policisë së Kosovës për rajonin e Pejës, Fadil Gashi.
Ai tha se lidhur me rastin janë intervistuar viktima, i dyshuari dhe dëshmitarët.
“Dje rreth orës 13:44, një punëtor i Spitalit të Pejës ka raportuar se është sulmuar nga një mjek në këtë spital. Policia menjëherë ka dal në vendin e ngjarjes, i ka intervistuar viktimën, dëshmitarët dhe të dyshuarin”, deklaroi Gashi.
Ai tutje bëri të ditur se me vendim të prokurorit, rasti është iniciuar si “lëndim i lehtë trupor”.
“Rasti shkon në procedurë të rregullt dhe është duke u hetuar nga njësiti kompetent policor”.
I pyetur se cili dyshohet se është motivi që çoi deri te sulmi fizik, Gashi tha “një mosmarrëveshje rreth orarit të punës”.
