Erdogan: Nuk e miratoj futjen e Finlandës dhe Suedisë në NATO.!
Presidenti turk Rexhep Tajip Erdogan deklaroi sot se nuk do të miratojë anëtarësimin e Finlandës dhe Suedisë në NATO. Siç dihet nëse vetëm një vend anëtar është kundër, procesi dështon.
Erdogan përforcoi deklaratën e tij kur tha edhe se diplomatët nga dy vendet nordike nuk ka nevojë të “mundohen” për të udhëtuar deri në Ankara për të bindur Turqinë që të miratojë kërkesën e tyre për t’u anëtarësuar në Aleancë sepse një gjë e tillë nuk do të ndodhë.
Sipas z.Erdogan, Finlanda dhe Suedia nuk kanë qëndrim të qartë kundër grupeve terroriste.
Deklarata e Erdogan erdhi pak orë pasi më herët sot, Kryeministrja suedeze Magdalena Anderson njoftoi zyrtarisht vendimin e Stokholmit për të aplikuar për anëtarësim në NATO.
Aplikimi i Suedisë erdhi një ditë pasi presidenti finlandez Sauli Niinisto konfirmoi se do të aplikonte për anëtarësim në Aleancën e Atlantikut të Veriut.
Turqia i befasoi aleatët e saj në NATO javën e kaluar duke thënë se nuk i shikonte pozitivisht kandidaturat e vendeve nordike dhe sot i vuri kapakun kësaj historie duke shuar ëndrrën nordike për t’i dhënë fund neutralitetit të deritanishëm.
Sipas Erdogan, Suedia dhe Finlanda, nuk i janë përgjigjur pozitivisht kërkesave të Turqisë, një anëtare e NATO-s për mbi 70 vjet, për ekstradimin e 33 terroristëve.
Erdogan shtoi se disa vende skandinave veprojnë në mënyrë efektive si “bujtina” për grupet terroriste.
Vetoja turke ka gëzuar Rusinë e cila ishte kundër dhe paralajmëroi veprime hakmarrëse ndaj NATO-s nëse dy vendet do të aderonin në këtë aleancë.
