22 projekte do të realizohen në Gjilan në vlerë rreth 13 milionë euro

Gjatë vitit paraprak Drejtoria për Zhvillim Ekonomik, ka shënuar progres të jashtëzakonshëm sa i përket tërheqjes së investimeve dhe të realizimit të aktiviteteve të cilat kanë ndikim të drejtpërdrejtë në zhvillimin ekonomik lokal dhe ngritjen e standardit të jetesës së qytetarëve të komunës së Gjilanit.

Kryetari i Komunës së Gjilanit Alban Hyseni, tha se sa i përket investimeve kapitale, janë gjithsej 22 projekte të reja infrastrukturë publike dhe sociale, të cilat do të realizohen në bashkë-financim me Komunën e Gjilanit dhe me mbështetjen financiare nga niveli qendror dhe donatorë të cilat kapin vlerën prej 12,913,448.72 euro.

DZhE-ja, do të bashkë-financoj projektet prioritare në vlerën prej 5.827,087.99 euro nga të cilat 7,086,360.73 euro do të financohen nga donatorët.

I pari i komunës tregoi gjatë vitit 2024 kishte filluar inicimi i projektit ndërtimi i Stacionit të Autobusëve në Gjilan, në vlerë prej rreh 1 milionë dhe është nënshkruar kontrata.

“Ky projekt madhor do të jetë një epokë e re për transportin, ku do të kemi një stacion modern. Kohëzgjatja e përfundimit të këtij projekti është për dy vjet”, tha Hyseni.

Ai më tej shtoi se disa prej projekteve të investimeve kapitale sipas marrëveshjeve me donatorë janë planifikuar të realizohen për periudhën dy-vjeçare dhe priten të përfundojnë sivjet.

Kryetari i Gjilanit, tha se Kult Qendra në lagjen Dardania, është në ekzekutim të punëve. Kjo po i shton vlerë kësaj fushe në Gjilan. Vlera e saj është 1. 2 milionë euro.

Sipas tij edhe zgjerimi dhe asfaltimi i rrugës “Hamdi Kurteshi” është në ekzekutim të punëve. Projekti është 2.4 milionë dhe është kryer rreth gjysma e punëve të kolektorit dhe punimet po vazhdojnë.

“Fundviti erdhi me super investim në Gjilan. Nënshkruam kontratën me vlerë prej rreth 2.7 milionë euro, po rinovojmë Palestrën e Sporteve, duke u ofruar sportistëve tanë kushte të shkëlqyera për t’u stërvitur, për të shkëlqyer dhe për të na bërë krenarë”, tha Alban Hyseni.

I pari i Gjilanit, tregoi në proces është edhe impianti për trajtimin e ujërave të zeza në qytet dhe së shpejti pritet të nisin punimet, pas shpronësimeve. Shumë qytetarë preken nga ky projekt i cili do të jetësohet.

Kryetari, tregoi edhe për asfaltimin e rrugës në fshatin Haxhaj, terrenet sportive. Kanalizimi fekal Livoç të Poshtëm – Livoç i Epërm- Lagjja Kodra e Thatë.

Ai përmendi edhe mini parqet, terrenet sportive në fshatin Mihyr. Projektin Smart Citz (Neutral Host).

Në tri shkolla janë bërë investime në infrastrukturë e laboratorë si: SH.F.M.U. ‘’Abaz Ajeti’’. SH.F.M.U. ‘’Rexhep Elmazi’’. SH.M.T. ‘’Mehmet Isai’’.

Sipas tij, asfaltimi i rrugës nga fshati Dobërçan- Pogragjë ka përfunduar prej 3.7 kilometrash. Në fshatin Malishevë po vazhdon faza e 2, asfaltimi i rrugës në fshatin Kokaj dhe rruga Llovcë – Ranatovcë.

Kryetari i Gjilanit, tha se komuna për vitet 2023 dhe 2024 ka përkrahur bizneset e reja dhe ato ekzistuese të grave me mjete financiare me vlerë 248,000.00 euro.

Ai shtoi se kjo ka për synim kryesor zhvillimin e ekonomisë lokale përmes mbështetjes për bizneset ekzistuese dhe krijimin e bizneseve të reja duke ofruar mbështetje në ngritjen e kapaciteteve për bizneset ekzistuese, avancime të reja teknologjike në pajisje dhe makineri të nevojshme në procesin e punës.

“Drejtoria për Zhvillim Ekonomik, me qëllim të përkrahjes dhe subvencionimit të bizneseve të reja dhe atyre të grave ndërmarrëse ekzistuese për vitin 2025 ka planifikuar në ndajë 220,000 euro”, tha kryetari Alban Hyseni.