𝐏𝐫𝐞𝐬𝐢𝐝𝐞𝐧𝐭𝐣𝐚 𝐕𝐣𝐨𝐬𝐚 𝐎𝐬𝐦𝐚𝐧𝐢 𝐯𝐢𝐳𝐢𝐭𝐨𝐢 𝐊𝐎𝐊-𝐮𝐧

Presidentja e Republikës së Kosovës, Vjosa Osmani, ka vizituar sot KOK-un, me ç’rast është pritur nga Bordi Ekzekutiv me në krye presidentin Ismet Krasniqi.

Vizita u bë në prag të pjesëmarrjes së ekipit olimpik të Kosovës në Lojërat Olimpike Paris 2024 dhe para ceremonisë së dorëzimit të flamurit, që mbahet sot në platon e Amfiteatrit të Gërmisë.

Presidenti Krasniqi duke falënderuar presidenten Osmani për vizitën, e falënderoi për mbështetjen për sportistët dhe bashkëpunimin e frytshëm ndër vite me KOK-un, duke theksuar se vetë vizita e saj dhe prania e saj në Tokyo 2020 dhe tani në Paris 2024 tregon përkushtimin për ekipin tonë olimpik.

Nga ana e saj, presidentja Osmani, vlerësoi lartë të arriturat e KOK-ut dhe sportistëve tanë, me theks të veçantë medaljet e arta olimpike, të fituara nga xhudistet tona, duke thënë se sportistët tanë janë promovimi më i mirë i vendit tonë.

Palët patën mundësinë e diskutimit për çështje të ndryshme në interes të sportit tonë, derisa KOK e njoftoi edhe për aktivitetet tjera si Platforma Evropiane e Sportit, Gala-Mbrëmja që do të mbahet me rastin e 10-vjetorit të anëtarësimit të KOK në IOC dhe çështje tjera.