Vizitë studimore e studentëve nga PH Zug në UKZ
Në kuadër të bashkëpunimit ndërkombëtar, Universiteti Publik “Kadri Zeka” në Gjilan ka mirëpritur një grup studentësh nga Shkolla e Lartë Pedagogjike ZUG e Zvicrës, të cilët po zhvillojnë një vizitë studimore një javore në UKZ.
Qëllimi i kësaj vizite është shkëmbimi i përvojave arsimore, njohja me sistemin e arsimit në Kosovë dhe forcimi i bashkëpunimit mes studentëve dhe stafit akademik të të dy institucioneve.
Në ditën e parë të vizitës, delegacioni nga Zvicra u prit nga Prorektorja për Mësimdhënie dhe Çështjeve të Studentëve Prof. Asoc. Dr. Shpresë Qamili, Prorektori për Buxhet, Financa dhe Infrastrukturë Prof. Dr. Naim Mustafa si dhe u.d. Udhëheqës i Divizionit Bashkëpunim Ndërkombëtar dhe Anëtarësime Betim Berisha, të cilët u kanë dëshiruar mirëseardhje studentëve zviceran. Ndërkohë është zhvilluar edhe një takim me stafin akademik të Fakultetit të Edukimit i drejtuar nga Porf. Dr. Merxhan Avdyli, ku u diskutua për programet studimore, mënyrat e zhvillimit të praktikës mësimore dhe rolin e mësuesit në shkollë dhe shoqëri.
Pjesë e agjendës janë edhe vizitat në shkollat fillore të qytetit të Gjilanit, si “Thimi Mitko”, “Musa Zajmi”, “Selami Hallaçi” dhe “Rexhep Elmazi”, ku studentët do të ndahen në grupe për të ndjekur orë mësimore dhe për të shkëmbyer përvoja me mësues e nxënës.
Gjithashtu, gjatë vizitës do të organizohen punëtori të përbashkëta, prezantime nga studentët e të dy universiteteve dhe diskutime rreth praktikave të mira të arsimit, të moderuara nga Prof. Asoc. Dr. Teuta Agaj, Prof. Asoc. Dr. Selim Daku dhe z. Betim Berisha.
Në ditën e fundit të programit, pjesëmarrësit do të marrin pjesë në një turne kulturor në Kosovë, duke vizituar Kompleksin Memorial të Prekazit, qytetin e Pejës, lumin Drini i Bardhë dhe qytetin historik të Prizrenit.
Studentët zviceran gjatë vizitës së tyre studimore, janë duke qëndruar nëpër familjet shqiptare, respektivisht nëpër familjet e studentëve tanë, për të mësuar më shumë për sistemin arsimor, për kulturën shqiptare, për traditat tona dhe në përgjithësi për jetën kosovare.
Kjo vizitë, që mbështetet nga UKZ, shënon një tjetër hap të rëndësishëm në zhvillimin e bashkëpunimeve ndërkombëtare të universitetit dhe në përgatitjen e mësuesve të ardhshëm me përvoja ndërkulturore e akademike.
