Vdes profesori gjilanas, ngushëllime shprehin Ramush Haradinaj e Nazim Gagica: Haradinaj: “Basri Zejnullahu dha kontribut të madh në edukimin e brezave”
Kryetari i Aleancës për Ardhmërinë e Kosovës (AAK), Ramush Haradinaj, ka ngushëlluar familjen Zejnullahu nga Gjilani pas ndarjes nga jeta të familjarit të tyre, profesorit Basri Zejnullahu.
Haradinaj ka thënë se profesori Zejnullahu ka dhënë kontribut të jashtëzakonshëm për edukimin e brezave.
“Basriu përveç që ka dhënë kontribut të jashtëzakonshëm për edukimin e shkollimin e brezave në rrethana të rënda për shqiptarët, ai ka lënë pas edhe shembullin e një njeriu korrekt dhe të sinqertë”, ka thënë Haradinaj.
Ngushëllime familjes i ka shprehur edhe kryetari i degës së AAK-së në Gjilan, Nazim gagica.
“I pikëlluar nga lajmi për ndarjen nga jeta të profesorit gjilanas, kolegut e mikut tim të kahershëm, Basri Zejnullahu”, ka shkruar ai.
“Janë të rrallë njerëzit si Basriu. Profesionist i dalluar, një bashkëpunëtor i sinqertë e një qytetar model. Profesor Basriu la pas vetes vepra të mira, një familje të edukuar dhe shembullin se si duhet të jenë njerëzit në raport me tjetrin. Të tillë do ta kujtojmë përjetë. Ngushëllime familjes Zejnullahu, kolegëve të profesionit dhe gjithë atyre që e njohën! U prehsh në paqe, Profesor!”, ka shkruar më tej Gagica.
