Vdes gjyshja e dajëve të Elbenita Kajtazi, artistja e përkujton me një rrëfim mallëngjyes!

Në një postim dedikues për gjyshën nga ana e dajëve të saj, artistja e njohur, sopranoja Elbenita Kajtazi, e ka kujtuar me pietet e nderime gjyshen e saj e cila sot ka ndërruar jetë.

Ajo ka rrëfyer momentin vendimtar të filleve të karrierës së saj artistike në hapat e parë, e që ndërlidhen me mbështetjen nga ana e gjyshes së saj tashmë të ndjerë. Ajo tregon “fill e për pe” se si gjyshja e saj ia bleu fustatin e debutimit në shkollën e mesme “Tefta Tashko”

Postimi i plotë dedikues i artistes për gjyshen e saj të ndjerë!

Postimini i sotëm i kushtohet gjyshes time, nanës Abide e cila sot ka ndërruar jetë.
Po ju tregoj një histori të shkurtër lidhur me të…
Kur kam qenë në shkollën e mesme të muzikës “Tefta Tashko” u përzgjodha që të dal si soliste për herë të parë në Shtëpinë e Kulturës, isha në vitin e parë të studimeve. Vrapova për në shtëpi plot entuziazëm e lumturi, kur u futa mbrenda duke kërcyer nga gëzimi thash nënës time , “ nënë na duhet një fustan sepse unë do dal si soliste në koncertin e shkollës “, nëna më shikoi dhe më tha “ jam shumë e lumtur për ty por fustan nuk blejmë dot për momentin sepse nuk e kemi mundësinë”.
Unë gjithmonë e kam mirëkuptuar gjendjen tonë financiare prandaj kurrë nuk kam protestuar ose kërkuar më shumë sesa e kam ditur se prindërit e mi do të jenë në gjendje të ofrojnë, por atë ditë u mërzita shumë dhe fillova të qaj.
Pas pak futet mbrenda Nana Abide e imja, gjyshja ime e dajve, m’u afrua më përqafoi edhe me atë zërin e saj të ambël e të butë më pyeti, “

• çka ke qika jeme ? “ … nëna ia shpjegoi të gjithë situatën.
  Ajo sapo ishte kthyer nga qyteti ku kishte marrë pensionin e pleqërisë, i nxorri ato para nga xhepi dhe ja zgjati nënës sime në dorë: “këto i kam“, i tha, “ këto po t’i jap, shko bleja qikës fustanin edhe kallxom kur është koncerti shkojmë bashkë e shohim”.
  Kjo ishte gjyshja ime, heroina ima e cila më ka përkrahur në çdo hap të jetës, nana Abide e imja e cila na priti gjithmonë me zemër të madhe, nana Abide e imja e cila na dha vetëm dashni e sytë e saj rrezatuan vetëm lumtuni edhe pse nuk kishte jetë aspak të lehtë.
  Nana Abide e imja sot iu bashkove engjëjve sepse aty përket, në mes engjëjsh.
  Prehu e qetë në paqe zemra ime e bardhë.