“Urime trofeu i parë i Kupës së Kosovës për qytetarët e Suharekës, për të ardhmen do të shohim” – Daja flet pas finales
Trajneri Ilir Daja i është gëzuar trofeut të radhës të fituar me Ballkanin, ku skuadra e tij fitoi sot Kupës së Kosovës, duke mposhtur Prishtinën në penallti, pasi loja e rregullt dhe vazhdimet u mbyllën 2-2.
Ballkani fitoi titullin e kampionit në javën që e lamë pas, duke siguruar dy trofe në sezonin 2023/24.
“E pranishme në futboll kur je 2-0 në epërsi. Je në gjendje të mirë psikologjike. Por, pastaj Prishtina mori një penallti që nuk dua të flas për të sepse u vendos edhe pas rishikimit të VAR-it. Kur rezultati bëhet 2-1, gjendja psikologjike kthehet në anën tjetër”.
“Ne u desh ta mblidhnim veten, por Prishtina u rikthye. Por, të marrësh një kampionat dhe të luash tre ditë më pas 120 minuta, vetëm lojtarët e mi mund të motivohen dhe të luajnë deri në fund. Në penallti është edhe fati”.
“Duke ditur që është trofeu i parë i Kupës, dua që t’i uroj qytetarët e Suharekës sepse e ndiejmë përkrahjen e tyre në çdo moment. Këto trofe, titullin dhe Kupën i kam fituar para gjashtë vjetësh edhe me Skënderbeun. Përsëritet sërish pas gjashtë vjetësh”, ka thënë Daja pas fitores.
Kur u pyet për të ardhmen e tij që është folur në muajt e fundit, ai nuk ka dhënë një përgjigje.
“Do të gëzohem një herë, e pastaj të shohim se çfarë do të ndodh më pas”, është shprehur Daja kur u pyet për të ardhmen.
