UKZ organizon diskutim me Zëvendësministren në detyrë Liza Gashi mbi fuqinë e diplomacisë së diasporës
Fakulteti i Shkencave Sociale në Universitetin Publik “Kadri Zeka” organizoi sot një takim të hapur me Znj. Liza Gashi, Zëvendësministre në detyrë në Ministrinë e Punëve të Jashtme dhe Diasporës në Kosovë, e cila mbajti ligjëratën me temën: “Fuqia e diplomacisë së diasporës në një botë të ndryshme dhe të lidhur”.
Këtë organizim e hapi Dekani i Fakultetit të Shkencave Sociale, Selim Daku, i cili theksoi rëndësinë e këtij takimi për studentët dhe rolin e veçantë që diaspora luan në proceset kombëtare të Kosovës.
Ai vuri në dukje se Universiteti ka përgjegjësi të kontribuojë jo vetëm në formimin profesional të studentëve, por edhe në ndërtimin e vetëdijes qytetare dhe ndërgjegjes së tyre për çështje të interesit kombëtar.
Ai nënvizoi se diplomacia e diasporës është një fushë moderne dhe shumëdimensionale, e cila kërkon dije ndërdisiplinore nga shkencat politike e administrata publike deri te marrëdhëniet ndërkombëtare dhe sociologjia.
Zëvendësministrja në detyrë Liza Gashi mbajti një ligjëratë të zgjeruar, ku theksoi rolin strategjik të diasporës kosovare në ndërtimin e imazhit ndërkombëtar të vendit dhe në forcimin e diplomacisë publike të Kosovës. Ajo foli për përvojat e saj profesionale, sfidat e përfaqësimit ndërkombëtar dhe rëndësinë e angazhimit të të rinjve në proceset diplomatike dhe komunitare.
Znj. Gashi theksoi se Diplomacia e diasporës është diplomaci njerëzore. Është mënyra se si qytetarët tanë, kudo që jetojnë, e përfaqësojnë Kosovën me punën, integritetin dhe suksesin e tyre.
Ajo i inkurajoi studentët që të jenë aktivë, të ndërtojnë lidhje ndërkombëtare dhe të shfrytëzojnë mundësitë që ofrojnë institucionet, programet edukative dhe rrjetet profesionale për të kontribuar në imazhin dhe zhvillimin e vendit.
Zv. Ministrja në detyrë znj. Liza Gashi gjatë ligjëratës u përqendruar te mënyra se si vendet e ndryshme kanë përdorur fuqinë e diasporës për zhvillim ekonomik e shoqëror. Ajo solli shembuj të qartë ndërkombëtarë, se si Irlanda, e cila mobilizoi diasporën e saj dhe e transformoi ekonominë nga varfëria në një histori suksesi evropiane, se si India, e cila u shndërrua në një superfuqi të teknologjisë falë rrjetëzimit të inxhinierëve dhe profesionistëve indianë jashtë vendit, se si Kina, e cila krijoi programe të fuqishme rikthimi dhe lidhjeje me profesionistët kinezë globalë, duke i pajisur ata me mundësi investimi dhe bashkëpunimi. Sipas saj, këto shembuj tregojnë se rrjetëzimi i diasporës është çelësi i suksesit.
Ajo shtoi se edhe për Kosovën, diaspora mbetet frymëzim, mbështetje dhe potencial transformues. Duke folur për migrimin e kosovarëve, znj. Gashi nënvizoi ndikimin e madh ekonomik të diasporës përmes remitancave, konsumit, investimeve dhe përfshirjes së tyre në zhvillimin social e kulturor të vendit.
“Diaspora është e rëndësishme. Kudo që jemi, kemi ndikimin tonë. Teknologjia dhe komunikimi modern nënkuptojnë se mund të jesh këtu edhe atje njëkohësisht,” theksoi ajo.
Znj. Gashi foli edhe për konceptin e rrjetit global, sfidat e ikjes së trurit, si dhe marrëdhënien e re mes individit, kombit dhe shtetit në epokën digjitale. Sipas saj, mërgata e Kosovës përfaqëson një katalizator të fuqishëm ekonomik, akademik dhe shoqëror.
Në një moment të veçantë, ajo iu drejtua studentëve të UKZ-së, duke ju thënë se e sheh mërgatën si katalizator për Gjilanin dhe për UKZ. Ky universitet nuk dallon nga universitetet tjera në Evropë, dallimi qëndron te mënyra se si i shfrytëzojmë lidhjet globale dhe potencialin e diasporës sonë.
Pas ligjëratës, studentët parashtruan pyetje rreth rolit të diasporës në diplomacinë publike, mundësive që ajo krijon për të rinjtë, mënyrave të përfshirjes profesionale dhe sfidave të politikave të migracionit.
Universiteti Publik “Kadri Zeka” vlerësoi pjesëmarrjen dhe kontributin e znj. Liza Gashi, duke theksuar se takime të tilla janë pjesë e vizionit të institucionit për të ofruar edukim cilësor, dialog kritik dhe lidhje të forta me profesionistët që po kontribuojnë në zhvillimin e vendit.
