UKZ nënshkruan marrëveshje bashkëpunimi me kompaninë “Rexhi Sh.P.K”
Universiteti Publik “Kadri Zeka” në Gjilan dhe kompania “Rexhi Sh.p.k” kanë nënshkruar një marrëveshje bashkëpunimi me qëllim të krijimit të mundësive praktike dhe punësimit për studentët dhe të diplomuarit e universitetit.
Marrëveshja u nënshkrua nga Rektori i Universitetit “Kadri Zeka”, Prof. Asoc. Dr. Artan Dermaku dhe nga pronari i kompanisë “Rexhi Sh.p.k”, z. Besim Rexhi.
Sipas kësaj marrëveshjeje, studentët e Fakultetit Ekonomik, Juridik dhe të Shkencave Kompjuterike me notë mesatare mbi 8.0 do të kenë mundësinë të përzgjedhen për praktika profesionale në kompaninë “Rexhi Sh.p.k”.
Praktikat do të zgjasin 2 deri në 3 muaj, gjatë periudhave të caktuara kohore, duke u mundësuar studentëve që të fitojnë përvojë konkrete pune në profilet e tyre përkatëse.
Në ceremoninë e nënshkrimit, Rektori Dermaku theksoi se ky bashkëpunim përfaqëson një hap të rëndësishëm drejt fuqizimit të lidhjes mes universiteteve dhe sektorit privat, duke krijuar ura konkrete për përgatitjen profesionale të studentëve.
