UKZ mbajti trajnim mbi monitorimin e programeve studimore

Në Universitetin Publik “Kadri Zeka” në Gjilan, u mbajt trajnim mbi Metodologjinë e Monitorimit të Programeve Studimore, i organizuar me qëllim të forcimit të cilësisë së  programeve studimore dhe përputhshmërisë me standardet e Agjencisë së Kosovës për Akreditim.

Trajnimi u realizua nga Prorektorja për Zhvillim Akademik dhe Cilësi, Prof. Asoc. Dr. Voglushe Kurteshi, në kuadër të aktiviteteve të parapara në Kalendarin për Cilësi, me rastin e fillimit të vitit të ri akademik. Një nga pikat kyçe të këtij kalendari është monitorimi dhe rishikimi i programeve studimore të akredituara, bazuar në procedurat pasakredituese të përcaktuara nga AKA.

Gjatë trajnimit u prezantuan :

1.Proceset dhe metodologjia e monitorimit të programeve;

2.Procedurat për verifikimin e përputhshmërisë së stafit akademik;

3.Monitorimi i bartësve të programeve dhe zëvendësimi i tyre në përputhje me afatet dhe kriteret e AKA-së;

4.Analiza e orareve të ligjëratave dhe ushtrimeve;

5.Kontrolli i informacionit të publikuar në uebfaqe dhe materialeve reklamuese të institucioneve.

Një pjesë e rëndësishme e trajnimit ishte prezantimi i standardeve të brendshme për monitorimin e programeve studimore, të cilat janë zhvilluar me qëllim të ngritjes së cilësisë së programeve studimore dhe të menaxhimit të vazhdueshëm të programeve. Këto standarde do të shërbejnë si udhëzues për të gjithë bartësit e programeve të akredituara, të cilët pritet të realizojnë procesin e rishikimit të programeve gjatë këtij viti akademik.

Standardet e prezantuara përcaktojnë qartë rolin e bartësve të programeve në mbledhjen dhe analizimin e të dhënave relevante, krahasimin me rezultatet e pritura të të nxënit, identifikimin e mangësive në kurrikulë, metodologji dhe vlerësim, si dhe hartimin e raporteve të rregullta të monitorimit për çdo program.

Ky trajnim përfaqëson një hap të rëndësishëm drejt fuqizimit të kapaciteteve institucionale, për të garantuar programe studimore cilësore, të qëndrueshme dhe të përshtatura me nevojat e studentëve dhe tregut të punës.